Siumut: Danskit oqaasii namminiilivinnissamut akornutaanngillat

Inatsisartuni danskisut oqaluttoqartarunnaarnissaanik Naleqqap siulittaasua Pele Broberg uani qaammammi siunnersuuteqarluni saqqummiussivoq.

Oqaatsimmi kisimik pineqaratik aammali namminiilivinnissamut sulinermut sunniuteqartoq, taanna isumaqarpoq.

Naalakkersuisoqatigiillu partiivi marluk Siumut IA-lu nunatta namminiilivinnissaanut iliuuseqanngippallaarnerarlugit asulilu oqaluinnarnerarlugit, Pele Broberg aamma isornartorsiuingaatsiarpoq.

Taamali isornartorsiuineq Siumup siulittaasuata Erik Jensenip tusaanngitsuusaaginnarusunngilaa.

Siumup namminiilivinnissaq anguniaraa

Taassuma naalakkersuisut politikkiat oqaaseqarfigerusunngilaa, namminiilivinnissalli Siumumit pingaartinneqarnera oqaaseqarfigerusullugu:

- Taanna angussaqqaarparput. Taamaattumik tassunga tunngasumik sulinerput ingerlapparput pingaarnerpaatulli inuiaqatigiittut ataatsimoorluta suliassamut tassunga akisussaaffimmik tiguseqatigiilluta suliamik ingerlatsissaagut, taanna oqarpoq nangillunilu:

- Inuttut partiitullu ataatsitut taamaallaat ingerlaniarsarissagutta ullormut ataasiakkaarinnilluta nammineq nuannareqqusaarnissaq pissagutsigu angusassaq annikinnerujussuussaaq. Taamaattumik ataatsimoorullugu amerlanerussuteqarluarnikkut allorassaaqatigiinnissarput angutserlugu sulinerput ingerlapparput, aamma taanna upperivara piffissami qanittumi taanna allorissaaqatigiffigalugu ingerlakkumaaripput.

Danskisut oqaatsit apeqqutaanngitsut

Danskit oqaasii politikkimi sulinermut akornutaakkajuttut, Pele Broberg KNR-imit apersorneqarnermini naliliivoq. Nunatsinnimi inuiaqatigiit pillugit oqallinnerit pingaarutillit kimeeruttartut, taanna isumaqarpoq.  

Erik Jensenili tamatumunnga isumaqataanngilaq. Danskimmi oqaasii Inatsisartuni politikerit sulinerannut apeqqutaaatinneqarujussuartariaqanngitsut taanna oqarpoq:

- Danskisut oqaatsit nunatsinni akimmiffiusutut oqaatigineqarsinnaanngillat. Uagut kalaallisut oqaaseqartuuvugut aamma oqaatsivut namminersorneq pillugu inatsimmi pingaarnertut inissinneqarnikuupput. Taamaattumik oqaatsinik arlalinnik piginnaasaqarneq immini ajunngitsuuvoq, kisianni kalaallisut oqaatsivut pingaarnerpaatillugit ingerlatsinissaq Siumumit apeqqusersorneqanngilaq.

Naalakkersuisuni kalaallisut oqaaseqanngitsunik ilaasortaqaraangat politikkerneq ilungersunarsillunilu akornuserneqartartoq, Pele Broberg oqarpoq.  

Taamali isornartorsiuneq Erik Jensenip aamma oqaaseqarfigerusunngilaa:

– Uanga taanna oqaaseqarfigisinnaanngilara. Inunnut ataasiakkaanut tunngassuteqartunut sammitissimaguniuk, taava taakku oqaaseqartissavai.

Allannguutaasinnaasut ammaffigigai

Inatsisartuni marlunnik oqaaseqarluni sulinermik unitsitsinissamik ilaasortat amerlanerussuteqartut kissaateqassappata, Siumut akornusersuerusunngitsoq siulittaasoq oqarpoq.

- Inatsisartut taanna aalajangiiffigisassarivaat. Inatsartut suleriaasianni aamma partiit tamarmik akuerisimasaanni ingerlatsineq ullumikkut ingerlasuuvoq. Taamaattumik apeqqut taanna inatsisartuni suleriaatsimiippoq, taanna oqarpoq naggasiillunilu:

- Oqareernittuut oqaatsivut uagut tunngavigalugit ingerlatsinissarput pingaarnerpaarpaajuvoq aamma taanna aallaavigalugu ingerlatsinerput naqissusereerpara. Kalaallisut oqaluttuuvugut eqqarsartuullutalu aamma oqaaseqaatigut suliagullu kalaallisut oqaatsitsigut tunngavillit ingerlappagut. Piumasaqaateqartoqassappallu aporfissaqartinngilarput.