Neriuffiit Kattuffiat aatsaat taama amerlatigisunik katersisoq: Nunarput ataqatigiilluni ataatsimoorpoq

Neriuffiit Kattuffiat nuna tamakkerlugu KNR TV-kkut aallakaatinneqartukkut ippassaq unnukkut katersuiniarpoq, aatsaallu taama angusarissaartigaluni.

Aningaasammi 4,7 millionit koruuninit amerlanerusut katersorneqarput.

Nikolaj Ezekiassen Neriuffiit Kattuffianni siulersuisunut ilaasortaavoq, katersuiniarnerullu iluatsilluarnera taassuma nuannaarutigaa:

- Nuannersorujussuuvoq nunarput ataqatigiilluni taamatut ataatsimoorluni katersuiniarnermi taamatut angusaqarsinnaammat, Neriuffiit Kattuffianni siulersuisunut ilaasortaq Nikolaj Ezekiassen taama oqarpoq.

Aningaasat ukununnga ilaatigut atorneqassasut

Aningaasat katersorneqartut suliniutinut assigiinngitsunut atorneqassapput.

Nikolaj Ezekiassenip oqarnera naapertorlugu Neriuffiit Kattuffiata Nuummi qatserisartoqarfikup nalaani nutaamik illutaarnissaanut ilaatigut aamma atorneqassapput, soorlu aamma napparsimasut ilaqutaallu pillugit suliniuteqartoqarnerulersinnaassalluni:

- Suliassarpassuarnik ulikkaarpugut assigiinngitsunik. Aamma illutaarnissatsinnut atulernissaanut piareersaatinut aamma atuisussaassaagut, taavalu aamma paasititsiniaanerit taavalu aamma napparsimasunut ilaqutaanullu pitsaanerusumik atugaqalernissaannut suliniutitsinnut aamma atorneqarumaarput, Nikolaj Ezekiassen, Neriuffiit Kattuffianni siulersuisunut ilaasortaq taama oqarpoq.

Neriuffiit Kattuffiata aamma naatsorsuutigaat aningaasat katersat ulluni tulliuttuni aamma amerliumaartut.