Kræftip kingunerisaanik iseq talerlu annaaneqarput, qatanngutigiilli inuunermik qujamasupput

Nappaassuarmut kræftimut akiuiniarnermi aningaasanik katersuiniarneq ingerlaleruttorpoq. Katersuiniarnerinnaanngilarli. Qatanngutigiit Sisimiormiut Inga Olsen aamma Ina Olsen, nappaassuarmit eqqugaanikkut tamarmik immikkut aqqusaarsimasatik pillugit oqaluttuarput.

Nunatsinni ukiut tamaasa 170 missaani kræftimik eqqugaasarput. Amerlanerpaartaallu aniguineq ajorput. 

Qatanngutigiit Sisimiormiut Inga Olsen aamma Ina Olsen, nappaassuarmit eqqugaanikuunertik pillugu Taseralimmi oqalugiarput.

Inga Olsen 2018-imi nappaassuarmit eqqugaavoq inuuneralu annaaniarlugu 2019-imi talia peerneqartariaqarsimalluni, illuanillu taleerunneq oqitsuinnaasimanngilaq.

- Kanngusuutigisarnikooqaara takutinnissara ittooralugu, ilaa, ingerlaannaq takuneqarsinnaagami amigaateqartoq, talera peqanngitsoq. Taakkua pillunga, pillunga, pillunga massakkut misigisimavunga qaangerlugit, Inga Olsen oqarpoq. 

Inga Olsenip nappaassuarmit eqqugaanikuunini pillugu Sisimiuni Taseralimmi oqalugiartoq. Assi © : Ole PL. Petersen / KNR

- Inuuneq ingerlaqqippoq. Kisianni soorunami ilaanni aperineqariataartarpunga, soorlu; “talit napigamii?”, “Naak talit?” … taava uanga qanoq akissaanga … inuk nalusara, taanna oqarpoq. 

Apeqqutit akiuminaattut

Ilaqutariit kræftimik eqqugaapput. Ina Olsenip ernera, marluliinissani sioqqullugu isimi illuanik nakusalermat, taamani aapparisanilu misissorsimavaat.

- Angutaalu assiligatsigu qaammaallatsillugu taava tassani erserami saamerleq qaqortumik qinngorneqartoq aappaalu aappalaartuulluni, Ina Olsen oqaluttuarpoq. 

Assimi takuneqarsinnaavoq ernerata isaani qaqortumik qingorneqartoq. 

Ernertik nakorsiukkamikku kingorna pilertortumik Danmarkimukartinneqarpoq paasineqarlunilu isimigut kræfteqartoq, isaalu saamerleq peerneqartariaqarsimalluni. Nukappiaraq maanna arfinilinnik ukioqarpoq, aperisinnaasarlunilu, sooruna kræftertariaqartunga?  Sooruna isera peertariaqarsimasoq? Qaqugu isigisaqaleqqissaanga?

- Taava anaatut akissutissat taakkua eqqarsaatigeqqaartarpakka, nalunarnermik qanoq akissanerlugu taamak aperigaangat, Ina Olsen attortisimaarluni oqarpoq. 

Nammineernissaq oqitsuinnaanngitsoq

Inga Olsen illuanik taleerukkami ikiorneqarnissani utaqqiinnarnagu nammineerneq sungiunniartalerpaa, soorlu nerisassani nammineq isumagalugit. Oqitsuinnasimanngilarli.

Kisimiitilluni angerlarsimaffimmini baconinik agguiniarluni qisuariaateqarsimavoq:  

- Tassani kamarujussuarnikuuvunga nilliallunga savik imaasiorlugu kitserivimmut, ilaa, nilliallunga Sooruna … sooruna uanga taamatut eqqugaasunga?” Kamarujussuarlunga, kisianni kisimiillunga. Taamatut takkuteriataarnikuuvoq taanna taamatut pikkunartigisumik, apeqquterujussuaq takkuteriataarluni; “Sooruna uanga … sooruna talera annaasariaqariga?

Inga Inakkullu ernerat ullumikkut peqqipput misissortikkiartortarlutilli, kræftertullu ilarpassui peqqissinngitsoortarmata, neriuuteqartuarput.

Neriunneq pigaarput

- Qitornamik annaasaqarnissaq sinnattupilunnertut takorloortarakku. Ina Olsen qullipilluni oqarpoq:

- Qujamasunnartaqaaq ulloq manna tikillugu misissortinnerit tamaasa ajorneq ajormat.

Inga Olsen qatanngutini isumaqatigaa:

- Aqqusaagarput imaannaanngikkaluaqisoq, soorlu akisugaluaqaaq talera peertariaqarlugu, kisianni inuuginnassaguma taanna toqqartariaqarnikuuvara, taamaanngippat toqusussaagama. Taava kisianni qujamasunninngorlugu, allatut ajornaqaaq, qujaniarniarta. Allanneq sakkussaqanngilaq: neriunneq, Inga Olsen kavaajani siijutigalugu illalaarpoq.

Neriuffiit Kattuffiat, nuna tamakkerlugu katersuiniarnerat tallimanngorneq novembarip aallaqqaataani nal. 20:00 aallartissaaq.