Ukiuni arlalinni utaqqisoqareersorlu: Kræftimik napparsimasut eqqissillutik isersimaarfigisaqarsinnaalissasut

-  Utaqqikatassimavarput, taavalu oqarsinnaagunarpugut kiisami aallartileqaaq.

Neriuffiit Kattuffiata allattoqarfiani pisortaq, Bent Møller oqarpoq.

Kattuffik ukiorpaalunni isumaqatigiinniareerluni nappaassuarmik kræftimik napparsimasunut Nuummi illuliornissamut isumaqatigiissuteqarpoq.

Nappaassuarmik kræftimik napparsimasut katsorsarneqarnerminni illu eqqissisimaarfigiartorsinnaassagaat, siunnersorneqarfigisinnaassagaat napparsimasullu ataatsimoorfigisinnaassagaat siunertaavoq. Illu tamatuma saniatigut napparsimasunut napparsimmavippalaanngitsumi qasuersaarfissaqartitsinissamut aamma periarfissiissaaq.

Illussaq isersimaartarfeqassaaq, ataatsimiittarfeqassaaq aneerasaartarfeqassallunilu. Taakku tamarmik nappaassuarmik kræftimik napparsimasunut eqqissisimasumik avatangiiseqartitsissapput. Assi © : Anda Hansen / KNR

- Nalunngilarput sinerissaminngaanniit kræftimik eqqungaasimasut amerlanerpaartaat Nuummukaqqaartartut aamma. Taava Nuummiinnerminni tikilluaqqusaapput, Bent Møller oqarpoq.

Neriuffiit Kattuffiata nittartagaa naaperorlugu nunatsinni kræftimik eqqugaasut ukiumut tamaasa 200-t missaanniittarput.

Utaqqineq sivisooq

Neriuffiit Kattuffiata illussaa 20 millionit koruunit sinnilaarlugit akeqarpoq, taannalu Dronning Ingridip Napparsimmavissuata ungasinngisaani, Nuummi ilinniartut najugaqarfikuata, Rotary-kollegiep inissisimaffikuaniissalluni.

Illussaq sanaartugassanik suliassinneqartartumit EMJ-Atconimit sanaartorneqarnissaa maajip ulluisa 14-ianni atsioqatigiissutigineqarpoq.

Illussallu toqqammavissaata sanaartorneqarnerata maanna allartissinnaalernera nuannerpoq. Suliariumannittussarsiuussinermi ajornakusoorsimavoq, Neriuffiillu Kattuffiat ukiuni sisamangajanni utaqqisariaqarsimasoq, Bent Møller oqarpoq.

- Nuummi sanaartorneq annertungaatsiartumik ukiuni kingullerni qalaajusalluni ingerlagami.

Nappaassuarmik kræftimik napparsimasut Nuummeersut sineriammeersullu illumut tikilluaqqusaassasut, Neriuffiit Kattuffiata allattoqarfiani pisortap Bent Møller nassuiaatigaa. Assi © : Anda Hansen / KNR

Neriuffiit Kattuffiata illussaa A.P. Møller Fondenimit, Kræftens Bekæmpelsemit aamma Neriuffiit Kattuffianit aningaasalerneqarpoq, taannalu 2026-mi juunip 30-ani naammassinissasoq naatsorsuutigineqarpoq.