Katersuiniarnermi aatsaat taama katersaqartigisut

Neriuffiit Kattuffiat ippassaq tallimanngornermi nuna tamakkerlugu katersuiniartorqarnerani unnukkut aqqaninngulersoq kisitsisit kingulliit saqqummiunneqarmata taama oqarput.

Nunatsinni nappaammut kræftimut akiuniarluni suliniaqatigiiffik Neriuffiit Kattuffiat aningaasanik katersuiniartitsinermi aningaasat aatsaat taama amerlatigisut katersorneqarput.

Ippassaq nuna tamakkerlugu katersuiniarnerani aningaasat 4 million koruunit sinnerlugit katersorneqarput.

Aningaasat Neriuffiit Kattuffiata qitiusumik siunnersuisarfissaanik pilersitsinissamut illuartinneqassapput aamma eqqugaasut qanigisaanut tapiissutitut atorneqassallutik.

Neriuffiit Kattuffianni Elisabeth Lynge Hansenip tamanna nuaarutigaa.

- Assut nuannerpoq toqqisisimanarpoq aamma angusaqarluarpugut.

Taama katersitiginissartik ilimanginngikkaluarpaa

Siorna novembarimi katersuiniarnermi 4,2 millioner koruunit sinnilaarlugit katersorneqarlutik, taamaallillutik Neriuffiit Kattuffiata ukioq manna 4,4 millioner koruunit sinnilaarlugit katersorneqarmata rekorti anguneqarpoq.

Eisabeth Lynge Hansenip taama amerlatigisunik katersisinnaanertik ilimagisimanngikkaluarpaa.

- Nuannersorujussuarmik massakkut angusaqarpugut, torersumik aammalu anguniakkagut pissangassutigisimavugut. Taamarsuaq ilimasunngikkaluaratta pissarsissalluta. Kisianni paasinarsivoraasit inoqatinnguagut sineriak tamakkerlugu taamatut tapersersuillutik angusaqartippaatigut.

Neriuffiit Kattuffiata siulittaasua Elisabeth Lynge Hansen ippassaq nuna tamakkerlugu katersuiniarnermi tunissuteqartut tamanut qujassuteqarpoq.

- Qujanarujussuaq kalaallit nunaanni tamassinnut, qujanarsuaq taama katersuiniarnitsinnut tapersersuilluarassiasiit neriussaanga aamma siunissami taama ingerlaqqikkumaarluta.