Neriuffik aatsaat taama amerlatigisunik katersaqarpoq

Neriuffiit Kattuffiat nuna tamakkerlugu katersuiniarnerani aningaasat 4 million koruunit sinnerlugit katsersorneqarput. Aningaasat Neriuffiit Kattuffiata qitiusumik siunnersuisarfissaanik pilersitsinissamut illuartinneqassapput aamma eqqugaasut qanigisaanut tapiissutitut atorneqassallutik.
Neriuffiit Katuffianni siulitaasoq Elisabeth Lynge Hansen nuannaarpoq, nuna tamakkerlugu katersuiniarnermi aatsaat taama amerlatigisut katersorneqarsimammata Assi © : Tusass
Allattoq Tobias Malte Kristensen, Jaaku Lyberth
oktobarip 29-at 2022 17:06

Nunatsinni nappaamut kræftemut akiuniarluni suliniaqatigiiffik "Neriuffiit Kattuffiat aningaasanik katersuiniartitsinermi aningaasat aatsaat taama amerlatigisut katersorneqarput.

KNR TV-ikkut toqqaannartumik aallakaatitsilluni katersuiniarnermi akunnernik pingasunik sivisutigisumi aningaasat 4.264.688 koruunit katersorneqarput. 

Neriuffiit Katuffiata siulittaasuata Elisabeth Lynge Hansenip piffissaq iluatsillugu ikiuussimasut tamaasa qutsavigai.

”Ukioq manna katersuiniarnermut aningaasanik tunissuteqartorpassuit kiisalu namminneq piumassutiminnik ikiuulluartorpassuit, nukippassuit atorlugit katersuiniarnerup iluatsilluarnissaanut suleqataasut qutsavigerujussuarpagut" Elisabeth Lynge Hansen taama oqarpoq

Ukiormanna qulequtaq aliasunneq

Ukiormanna katersuiniarnerup qulequtaraa ”Aliasunneq”, aningaasallu katersat ilaat Neriuffiit Kattuffiata qitiusumik siunnersuisarfissaanik pilersitsinissamut illuartinneqassapput, tassani illup iluani atortussat suliniutinut nappaassuarmut eqqugaasunut qanigisaanullu iluaqutaasussaapput, kiisalu Neriuffiup ingerlatsineranut neqeroorutaasalu atajuarnissaannut qulakkeerinneqataassallutik.

Tusassip pisortaanerata Kristian Reinert Davidsenip katersuiniarnermi angusat iluarisimaarpai imalu oqarpoq:

- Napparsimanerup ingerlanerani annaasaqarsimanermilu aliasunneq qanigisaasunut qimagaasunullu qaangeruminaassinnaasarpoq. Tamatta qaangiiniarnitsinni ikiorneqarnissamik ikorfartorneqarnissamillu pisariaqartitsilersinnaasarpugut. Taamaammat pingaaruteqarpoq Neriuffiup oqaloqatiginnittarfittalimmik illutaarnissaanut ullutsinnut tulluuttumik kræftimik eqqugaasut qanigisaasullu ornittagassaannik peqalernissamut tamatta tapersiinissarput, Kristian Reinert Davidsen oqarpoq.

Neriuffiit Kattuffiat nalunaaruteqarpoq ukioq nutaamiit napparsimalersimasunut tapit annertusineqassasut. Napparsimalersimasut ullumikkut 3.000 koruuninik taperneqartarput. 1. januar 2023 aallarnerfigalugu inersimasut 4.500 koruuninik tapiiffigineqartalissasut, aviisi Sermitsiaq AG taama allaaserisaqarpoq.

Tallimanngornermi unnukkkut katersuiniarnerup nalaani ilisimatitsissutigineqarpoq

Danmarkimi Kræftens Bekæmpelse Neriuffiit Kattuffiannut 10 milliuunit koruuninik tapiissuteqartoq. Taakku nunatsinni katersuiniarnerup saniatigut pissarsiarineqarput.

Neriuffiit Kattuffiat taamaalilluni 14.264.668 kr-nik aningaasaateqalerpoq

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk