Pele Broberg: Danskisut oqaatsit Inatsisartuni sulinermut kinguarsaataapput
Naleqqap siulittaasua, Pele Broberg aalajangiisinnaasuuguni Inatsisartuni danskisut oqaluttoqartarunnaassagaluarpoq. Tamatuma saniatigut ullumikkutulli danskisuumut toqqaannartumik nutserisoqartarunnaassagaluarpoq.
Taassuma oqarnera naapertorlugu tamanna kalaallisut oqaatsit - nunatsinni pisortatigoortuusut - Inatsisartunilu isumassarsiornermi isummersoqatigiinnernilu isumatusaarutaaginnaratik salliunneqarnissaannik qulakkeerinnissaq.
Tamanna ataatsimiittarfimmi oqaloqatigiinnerup qaffasissusaanut pitsaanerulersitsinissamut aamma tunngavoq.
- Ullumikkutut nutserisoqartartillugu tamat aaalajangeeqatigiinnissaq pillugu oqallinneq ajorput. Tassa naatsumik oqaatigalugu. Taamaammat kalaallisuinnaq ingerlatsileraluarutta tamat oqallinnerannik malinnaasoqarsinnaajunnaassaneraaneq eqqunngitsuuvoq.
Toqqaannartumik nutserisoqarnera oqaloqatigiinnermut unitsitsisartoq
Pele Broberg danskit oqaasiisa politikkikkut sulinermi sunniuteqartarnerannik aatsaat atorunnaarsitsinialinngilaq.
Ilungersunartoq tamanna pillugu inatsisissatut amerlasuunik siunnersuuteqarnikuuvoq, oqallisaaruteqarnikuuvoq kisissaanngitsunillu apersorneqarnikuulluni.
Pele Brobergilli danskisut kalaallisullu allaffissornikkut sulisoqarssinaanera ingerlaannarsinnaasoq erseqqissarpaa. Inatsisiliornerup kalaallisut ingerlanissaa pingaarpoq – Inatsisartunilu kalaallisut oqalunissaq suli pingaarnerulluni:
- Oqaluttarfimmiit oqaatsit atorneqartut atuuttussussaasut ullumikkut allassimavoq. Tassa imaappoq oqalutsip oqaatigisai atuuttussaapput, taanna oqarpoq, nangillunilu:
- Inatsisartuni oqallinnermik toqqaannartumik nutserneqarsimasumik paasinnissimasumik naapitsinikuunngisaannarpunga. Ataasinnguamiilluunniit naamik. Ataatsimiittarfimmiillunga nutserikkanik tusarnaarnikuuvunga, sunalu oqaluuserineqarnersoq paasissaanngilaq.
Danskisut oqalunnerup tamat oqartussaaqatigiinnerat aseroraa
Innuttaasut 10 procentingajai kalaallisut paasisinnaanngitsut kisitsisit kingulliit takutippaat.
Danskisuumut nutserisarneq unitsitsisoqaraluarpat taakku Inatsisartut oqartussaaqatigiittut oqallinnerannut malinnaasinnaajunnaaratarsinnaapput.
Pele Brobergilli oqarnera naapertorlugu oqaasiinnaanngitsut pineqarput:
- Nunatsinni innuttaasut tuluttut oqaaseqartut kimilluunniit oqaluuserineqanngillat. Taakkuli toqqaannartumik nutserneqartumik aallakaatitamik malinnaasinnaannginnertik ajornartorsiutiginngilaat. Danskisulli oqaatsit kisimik inuit ilaannut unammillernartuupput, taanna oqarpoq, nangillunilu:
- Quiassuarneruvoq. Danskisut oqaatsit tamat aalajangeeqatigiinniarnerannik unitsitsiniutitut atorneqanngissorigaanni imminut uukapaatinneruvoq.
Ataasiinnarmik oqaasillit allanut mattussisut
Kisianni Inatsisartuni ilaasortanik – allaat naalakkersuisuni ilaasortanik – danskisuinnaq oqaaseqartoqarnera immaqa suli soqutiginarneruvoq.
Taakkuli oqallinnermit mattutivinneqarnerat tamat oqartussaaqataanerannut ajoqutaassannginnersoq Pele Broberg aperineqarami oqallisigisamut tunngaviusoq mumippaa:
- Inatsisartuni siulittaasup kina naalakkersuisuussanersoq aalajangertarpaa. Tamanna pisinnaatitaaffiunngilaq. Oqalutseqarnerup ilungersunarnera pissutigalugu ataasiinnaap danskisut oqaaseqartup tamat oqallinnerannik unitsitsivittarnerani naalakkersuisuniippunga, Pele Broberg oqarpoq.
- Taakku mattunneqarnerannik oqarneq quiassuarneruvoq. Naamik, taakkuuku allanut tamanut, kalaallisut oqaluttunut mattussisut. Pissutsit taakku taamaaginnartikkutsigit danskisut oqaaseqartutut inuiaqatigiiuinnassaagut.
Pele Brobergip toqqaannartumik nutserisoqartarneranut isornartorsiuinera KNR-ip Inatsisartuni oqalutsit pisortaanut Naja Rosing Ludvigsenimut saqqummiuppaa.
Mailikkut ima akivoq:
"Naliginnaasumik inatsiartuni ilaasortat siunnersuutai oqaaseqarfigineq ajorpagut.”
”Inatsisartuni ataatsimiinnerit tamaasa toqqaannaq nutserinerit pitsaassusaat nakkutigisarpagut. Oqaluuserisani saqqummiunneqartunilu toqqaannartumik nutserinermut naammagittaalliutit qaqilertuaannarpagut. Ataatsimut isigalugu toqqaannartumik nutserinermut tamakkiisumik isorinninneq qaqileruminaappoq, soorlu inersuarmi ataatsimiinnerni isorinninnerit inatsisartut siulittaasuanut apuunneqartarput sulisunut ataasiakkaannut isorinninnerit tunniunneqarneq ajorput."
