Folketingimi kalaallisut oqaloqqusaasut: Nutserisalernissarli uparuarpaat

Markus E. Olsen Siumumeersoq Folketingip oqaluttarfiani siullermeerluni sisamanngorpat oqaaseqassaaq, kalaallisut.

Siumut sinnnerlugu Folketingimi ilaasortamut Aki-Mathilda Høegh-Dam-imut ullup tullia ilanngullugu sinniisuussaaq, taamaattumillu Folketingip oqaluttarfianinngaanniit ammaanersiornermi oqaaseqarnissani angumerissavaa.

Oqaatsit ilitsoqqussani atussavai. Taamaattoqarsinnaanerami Folketingip Siulittaasoqarfiata sapaatit akunneranni kingullermi akueraa.

Kisianniuna oqaluttarfimmi ileqqussatut saqqummiussaq naammaginngikkaa. Kalaallisummi oqaaseqareeruni, danskisut savalimmiormiutullu oqaasillit paasissappanni, nammineq danskisuumut nutserlugit aamma saqqummiissaaq,

Kisianni aamma oqaasissani siumungaaq allareersinnaavai, nutsertillugillu, kalaallisullu saqqummiisoqarnerani nutsikkat atorlugit najuuttut malinnaasinnaapput. 

Periarfissalli taakku arlaannaalluunniit suliassamik oqinnerulersitsinavianngitsoq, Markus E. Olsen oqarpoq.

-Uannut ajornannginnerpaajussagaluarpoq, oqaatsikka toqqaannartumik oqalutsip danskisuunngortittuuppagit.

Peqatigitillugu Markus E. Olsenip uggoraa, pitsaanerusumik siusinnerusukkulli aaqqiissuteqartoqannginnera.

- Folketingimi ukiuni 70-ini ilaasortaatitaqartuarpugut maangalu anngunnissatsinnut nukippassuit atortarlutik. Tupannaqaaq eqqarsaatigineqarsimanngimmalluunniit. Danskinut uagut naleqqussartuaannarnissarput ilimagineqarnersoruna, oqarpoq nangilluni.

- Piffissanngorpoq suleqatigerusukkunikkunisigut uagut piumasatta, uagut nipitta aamma uagut oqaatsitta nalitut isigineqalernissarput.

Oqaasissatut allariikkat allanngortinneqarsinnaanngitsut

Markus E. Olsen oqaluttuarpoq, kalaallisut oqaatiginiakkani nutsertereerlugit, folketingimi ilaasortat allat allaganngorlugit tungaanut tigoreerniassammatigit.

Kisianni aamma unamminartoqalaarnerarpaa. Politikerimmi oqaluttarfimmit saqqummiinissamik tungaanut oqaasissatik allanngulaartittuaannartarpaat, pingaartumik Folketingip ammaanersiornerani naggataarneranilu oqallittoqarnerani.

Oqallinnerit nalunaaquttap akunnerpassuarni sivisussuseqarsinnaasarput. Atlantikullu avannaamiui, statsministerip naggataamik oqaaseqannginnerani, kingulliullutik saqqummiisarput.

Oqaaserisassat nutserteriikkat pissutigalugit, Markus E. Olsenip oqaluttarfimmut qaqinissap tungaanut oqaasissat oqallinnerup nalaani qaffakaasut ilanngussinnaanagillu oqaasissani allanngortissinnaassanngilai. Tamannalu Folketingimi oqallinnermi naligiimmik peqataanissamik killiliisuuvoq, Markus E. Olsen oqarpoq.

Tamakkumi apeqqutit akissutillu, politikerit allat oqaaseqartumut apeqqutigisinnaasaat. Kalaallisut danskisulluunniit akisassavagut imaluunniit qanoq pisoqartassava?

- Uagut ima aaqqipparput, kalaallisut akisinnaavunga. Kisianni oqalutseqanngimmat, naatsumik imaqarniliorlugu danskisut nassuiaasinnaavunga.

Pakatsissutini Folketingip siulittaasuanut Søren Gademut apuussimallugit (V), Markus E. Olsen oqaluttuarpoq, neriupporlu paasineqassalluni.

- Ajornartorsiutaalissaaq, saqqummiussakka oqallisigineqassappata, danskisut oqaaseqarnissara aamma isersimasunut pisariaqalersussaammat. Kisianni atortorissaarutinik oqalutseqartoqassatillugu tusarnaaruteqartitsinissamut piffissaqartoqarnavianngimmat, taanna periarfissatuaassaaq.

Aki-Mathilda Høegh-Dam (S), Folketingiimi ilitsoqqussaralugu oqaatsit atorneqartalernissaanik oqallinnermik aallartitsisuuvoq, Folketingip oqaluttarfiatigut kalaallisuinnaq oqalunnissani upernaap ilaagut toqqarmagu. Assi © : Siumut

Poortuiinnariarluta angerlaqisa

Christiansborgimi oqalutsit isersimaffissaannik pilersitsisoqassappat allanngortiterinernut 40 millioni koruunit atorneqartariaqassasut, Folketingimi siulittaasoq, Søren Gade (V), KNR-imut oqarnikuuvoq, . Taassuma saniatigut oqalutsinut nutserisunullu aningaasartuutissat ukiumut 200 millioni koruuniusinnaasut taggippaa.

Aningaasartuuteqarnerulernissaq Folketingimi siulittaasoqarfiup, Folketingimi qullersaasut, tapersersunngilaat.

Markus E. Olsenili oqarpoq, aalajangerneq tunngavissaqarsorinagu.

- Taavami Folketingimi ilaasortaatitaqannginnissarput piffissanngorsimassaaq. Uagutsinnut aningaasartuuteqartariaarutissapput, aamma akisussaaffiit oqartussaaffiillu kalaallinut tunngasut Danmarkip maanna isumagisai, pisariaarutissapput, oqarpoq nangillunilu.

- Aamma poortuinissaq taava tullinnguussimassaaq. Poortuteqatigisinnasavaatigut, taava oorinik sipaassapput.

Folketingip siulittaasoqarfiata toqqaannartumik oqalutseqalernissaanut aningaaleerusunnginnerat IAp Folketingimi ilaasortaatitaata, Aaja Chemnitzip, aamma uparuarnikuuaa