Danskit atuisartut kalaallit nerisassaataat tupaallaatigigaat

Nunatta kujataaniit immiaaraq, nunatta kimmut sineriaaniit nipisat suaat kuannernillu kiinnamut tarngutit nioqqutissaapput Aarhusimi takussallugit qaqutigoortut.

Aarhusimi sapaatip akunnerata naanerani ukioq manna Food Festivalertoqarnerani takkuttut kalaallit nioqqutissaataannik misiliisinnaapput.

Suliffeqarfippassuit Kalaallit Illuutaata Aarhusimiittup suleqatigineratigut danskit atuisartut kalaallit nioqqutissaataannik pingaartumik inuussutissaataannik ilisimasaqarnerulersinniarpaat.

AAMMA ATUARUK Nunatta nunat avannarliit ilikkagaqarfigisinnaagai

Suliffeqarfik Qajaq Brewery Narsameersoq immiaaqqanik nunatsinni ullumikkut taamaallaat tuniniaasartoq peqataasunut ilaavoq.Suliffeqarfilli siunissami danskit niuertarfiini aamma tuniniaalerusuppoq.

Suliffeqarfik immiaaraliornermi nammineq najoqqutassialinnik pingasunik immiaaraliortoqartoq sanasarnerallu piujuartitsinikkut suliarineqartartut, piginneqataasup Kattie Nielsenip KNR-imut oqaatigaa.

- Assigiinngitsunik immiaaraliorsinnaasunik immiaaraliortoqarluta oqartarpugut, taavalu immiaaqqat nunatsinni imermik minguinnerpaamik sanaajusut oqaatigisarlugu.

Erngullu pitsaassusaa nunamilu sumi sananeqarnerat tupaallaataallunilu alutorineqarluarpoq – pingaartumik danskinit, Kattie Nielsen oqarpoq. Allaat danskit immiaaqqanik nuannarisaqarluartut narrutuut akornanni.

- Immiaaqqanik mamarisaqarluartut Danmarkimilu immiaaqqanut tunngatillugu ilisimasaqarluartut. Taakkunanngalu immiaaraatigut pitsaanerartittarnerat tusarlugu nuannertuaannarpoq.

Assigiinngitsut tupaallaataasut

Kalaallit tallimanngormat Food festivalertitsineranni Anna Marie Lidegaard takkuttunut ilaavoq.

Kalaallit inuussutissaataat eqqarsaatigigaangakkit taava suna siulliullugu eqqarsaatigisarpiuk?

- Raajat, taakku nerilluartaqaakka. Mamartorujussuupput, Anna Marie Lidegaard oqarpoq.

Nioqqutissat assigiinngitsorpassuupput, immiaaqqaninngaanniit naasunit sanaanik nioqqutissiaqarpoq, soorlu kalaallit tarngutiliaat. Tamakku tusareernikuuigit?

AAMMA ATUARUK Nerisassanik Facebookikkut tuniniaaneq inerteqqutaasoq

- Ilumuuillunga oqassaguma, naamik. Tusarnikuunngilakka. Matasimut iseraangama tamakku takuneq ajorpakka. Kalaallit nioqqutissaataannik takusaqarnikuunngisaannarpunga.

Kalaallit nioqqutissaataat aalisagaanatillu qaleruaqanngitsuusut oqaatigigaanni taava arlaannik soqutigisaqarpit imaluunniit ilimagisaqarpit?

- Kalaallit nioqqutissaataat pinngortitameernerussuunissaat tipigissaatitaqaavinnatillu sapigalinnoortuunissaat takorloorpara. Taamaammat pinngortitameersuusut minguitsorujussuusullu eqqarsarpunga. Tulliani taakkunanik pisillunga misiliissagunarpunga, Anna Marie Lidegaard oqarpoq.

Neqitorneq ajortut soqutiginninnerulersitsisut

Naak Aarhusimi Kalaallit Illuutaat kalaallit nioqqutissaataannik nutaanik Food Festivalimi soqutiginnilersitsiniaraluartoq suliffeqarfik nunatsinneersoq ilisimaneqarluartoq aamma peqataavoq.

Royal Greenlandimmi danskit amerlanerusut aalisakkanik qalerualinnillu nerisaqartilerusukkai, Nunani Avannarlerni nioqqutissanik nittarsaassinermi pisortap, Marianne Rottbøllip KNR-imut oqaatigaa.

- Danmarkimi aalisakkanik qalerualinnillu nerisaqarnissatsinnut pikkorippallaanngilagut, taamaammat atuisartut qaaqqusinermi nalliuttorsiornernilu kisimi taakkuninnga nerisaqaratik ulluinnarni taakkuninnga nerisarinissaannut sunniuteqarnissamut periarfissagissaarpugut.

AAMMA ATUARUK Naalakkersuisooqatigiit illup iluani naatsiiveqarneq siuarsarniarpaat

Takkuttut qaleralinnik, raajanik nipisaallu suaannik misiliinnginnerminni Royal Greenlandimit aalisakkanik ajornaatsumik iganissamut ilitsersuutinik tunineqarput.

Suliffeqarfiuttaaq danskit pisisartut uumasut atugaannik piujuaannartinnissaannillu aallussisut amerliartortinniarsarai.

- Neqitortanngitsut inuunerminniluunniit nerisassanik aalajangersimasunik nerisaqarusuttut neqillu pineqarnerunerat aalisakkanut qalerualinnullu sunniutigissaarpoq. Aalisakkat qaleruallillu peqqinnartuullutillu proteineqarluartut isumaqarput, taamaammat vegetariugaluarluni aalisagartornissaq qalerualittornissarlu ajorani (…). Tamanna ullutsinni atugaavoq, Marianne Rottbøll oqarpoq.