Danmarkimi kalaallit angerlarsimaffeqanngitsut annerusumik suliniuteqarfiginissaannik IA piumasaqartoq
Danmarkip aningaasarsiornermut ministeriata aningaasaliinissaa IA-p piumasaqaatiginiarpaa.
Aningaasat pensionatimut, angerlarsimaffeqanngitsut unnuisarfigisinnaasassaannut, inuiaqatigiinnilu peqatanerulersitsinissamut ilaatigut atorneqassasut siunnersuutigineqarpoq.
Kalaallit Danmarkiliartut suliffeqaratillu, ilinnialinngitsut, inuiaqatigiinniluunniit arlaatigut akunnerunissamik siunniussaqanngitsut ikiorneqarnerat annikippallaarpoq. Inuit Ataqatigiit Folketingimi ilaasortaatitaat Johan Lund Olsen taama isumaqarpoq. Kalaallit Danmarkimi angerlarsimaffeqanngitsut ikiorneqarnissaannut aningaasaliisoqarnissaa, aappaagumut aningaasanut inatsisissami qulakkeernissaa, taassuma sulissutiginiarpaa.
AAMMA ATUARUK Danmarkimi illoqarfiit arlallit kalaallinut nuuttunut immikkut neqerooruteqartalersut
- Ajornartorsiutip annertussusaa takusinnaagatsigu taama siunnersuuteqarpugut. Pingaartumik inuusuttut amerliartuinnartut siunissamut annerusumik pilersaaruteqaratik Danmarkiliartarput, Johan Lund Olsen oqarpoq.
Kalaallit Danmarkimi angerlarsimaffeqanngitsut amerliartortut, kisitsisit Kalaallit Danmarkimi Illuutaanneersut takutippaat. Kalaallit Danmarkimi angerlarsimaffeqanngitsut siorna 58-iusut, nalunaarsuinerit siulliit takutippaat, Danmarkimi angerlarsimaffeqanngitsut inuiaassusaat misissorneqarsimallutik.
Aalborgimi angerlarsimaffeqanngitsut sisamaagaangata ataaseq kalaaliusarpoq, Københavnimilu quliugaangata ataaseq. Tamanna ernumanarpoq, Johan Lund Olsen oqarpoq.
- Kisitsisit ernumanaqaat. Kalaallillu Danmarkimi illuutaat tamanna uparuarnikuuaat. Danmarkimilu naalakkersuisut iliuuseqarsimanatik, oqarpoq.
AAMMA ATUARUK Siunnersuisoqatigiit: Kalaallit Danmarkimut nuuttut paasissutissanik tunineqartalerlik
Aningaasat 14 millionit koruunit, kalaallinut Danmarkimi inuuniarnermikkut ajornartorsiutilinnut pillugit suliutinut siorna 2013-imi immikkoortinneqarput, suliniutillu 2016-ip tungaanut ingerlassallutik. Annerusumilli tamanna iluaqutaasimanngilaq, IA-p Folketingimi ilaasortaatitaa isumaqarpoq.
- Aningaasaliissutit sullinniakkanut atorneqarneq ajortut isumaqarpunga, inunnilli isumaginninnermi aqutsisoqarfimmut annerusumik atorneqartarlutik. Aningaasaliissutit sullinniakkanut atorneqartariaqaraluarput, Johan Lund Olsen oqarpoq.
Danmarkimi angerlarsimaffeqanngitsut ataatsimut isigalugit ikilisinneqarnissaat, Danmarkimi naalakkersuisut anguniagaraat.