Siunnersuisoqatigiit: Kalaallit Danmarkimut nuuttut paasissutissanik tunineqartalerlik

Maannakkut amerlasuutigut pisartutut nuuttut Danmarkimi inuuniarnikkut ajornartorsiulinnginnissaat anguniarlugu taama iliorlutik, Siunnersuisoqatigiit siulittaasuat Jann Sjursen Manu Sareenimut allappoq.

- Angerlarsimaffeqanngitsut 2013-imi kisinneqarneranni paasinarsivoq kalaallit Danmarkimi angerlarsimaffeqanngitsut 2 procentiinnaat atornerluinerminnik tarnikkullu nappaateqarnerminnik katsorsarneqalersimasut. Erseqqarippoq pisariaqartitsisut ikiorserneqartanngitsut, Jann Sjursen oqarpoq. Taamaattumik Siunnersuisoqatigiit pisariaqartissimavaat ministerimut akisussaasumut tigussaasunik inassuteqarnissartik.

Inassuteqaatit pingaarnertut ilagivaat isumaginninnikkut inatsit kommuninik pisussaatitsissasoq kalaallinut nuuttunut tikilluaqqussummik paasissutissanik tunniussaqartarnissamik. Taanna kulturikkut oqaatsitigullu paasinartumik saqqummiussanik imaqassaaq, soorlu makkununnga tunngasutigut : pilersorneqarneq, inissaqarneq, suliffissarsiornermi ikiorneqarneq, ilinniarnermut periarfissat, isumaginninnikkut periarfissat, qallunaatut ilinniarneq aamma nutserisunik ikiorneqarnissamut periarfissat.

- Amerlasuut isumaqartarput Danmark Kalaallit Nunaallu assigiittut. Kulturikkulli isumaginneriaatsikkullu inuiaqatigiit taakku assigiinngitsupilussuarnik aaqqissuussaapput. Tamakku pillugit kalaallit Danmarkimut tikikkaangamik paasitinneqartariaqarput. Naalagaaffeqatigiinnerup iluani innuttaasunut Danmark paasissutissiinissamut pisussaatitaavoq, taamaaliunngikkuni sumiginnaassaaq, Jann Sjursen oqarpoq.

Ajornartorsiortunut Siunnersuisoqatigiit inassutigaat kalaallinut Danmarkimut tikerlaanut najugaqarfik pensionati immikkut ittoq aamma pilersinneqassasoq. Tassani kalaallit siunnersorneqarlutillu ilitsersorneqarsinnaassapput, inassutigaallu tarnip pissusiinik ilisimasalimmik ikiorserneqarnissamut periarfissaqartitsinissaq, atornerluinermullu katsorsarneqarsinnaanermut aamma periarfissiisinnaanissaq.