Danmarkimi illoqarfiit arlallit kalaallinut nuuttunut immikkut neqerooruteqartalersut
DANMARK: Danmarkimi illoqarfiit anginerit arlallit kalaallinut ilinniakkamik ingerlataqaratik imaluunniit suliffissaqaratik tikittunut immikkut ittumik neqerooruteqartalerput. Danmarkimi Isumaginninnermut aqutsisoqarfiup kalaallinut ikiortarialinnut periusissiaanut atatillugu taama ingerlatsisoqartussanngorpoq.
Odensep Esbjergillu kalaallinut Danmarkimut nooqqammersunut tamanut neqeroorutigisartagaasa assinganik Aalborgip Kommunia neqerooruteqartalerpoq. Taamatut neqerooruteqarnermi qaammatini pingasuni ilaatigut inissarsiornermut, aningaasatigut ikiorsiissutinik tapiissutinillu qinnuteqaateqarnissamut suliffissarsiornissamullu ikiuisoqartarpoq.
AAMMA ATUARUK Siunnersuisoqatigiit: Kalaallit Danmarkimut nuuttut paasissutissanik tunineqartalerlik
Neqeroorutit taama ittut Danmarkimut qimaasunut ullumi neqeroorutigineqartarput. Kalaallilli danskisut innuttaassuseqaraluarlutik taakkutulli ikiorneqarnissaminnik pisariaqartitsigajuttartut, Aalborgip Kommuniani kalaallinut ikiortarialinnut periusissiami suliniutinik ataqatigiissaarisoq Karoline Jensen KNR-imut taama oqaluttuarpoq.
- Kalaalerpassuit Danmarkimi inuunermut sungiussiniarnerminnik ajornartorsiutillit naapittarpagut. Tamakkulu suliffeqarnermut, peqqinnissaqarfimmut, meeqqat atuarnissaannut allanullu tunngassuteqarsinnaapput. Tikittunullu neqeroorutigisarput pisariaqartitsinermut aaqqiissutissatut isigaarput.
Aalborgimut nuuttartut amerliartuinnartut
Kalaallit Aalborgimut nooqqammersut tamaasa, suliffeqannginneri, inissaqannginneri imaluunniit allatigut pisariaqartitsineri kommunip kalaallinik sullissisuisa paasigaagamikku taamatut neqeroorfigineqartarput.
Taamatullu inissisimasut ajoraluartumik amerliartuinnarput. Aalborgip Kommuniata Kalaallinut Sullissivik 2009-mi pilersimmagu illoqarfimmi kalaallit inuuniarnikkut ikiortariallit 100-t missaanniipput. Maannalu ukiut tallimat qaangiunnerini 300-t missaanniilersimapput, tamannalu kialaarfimmut Svenstrupgårdimut Aalborgimilu Kirkens Korshærip ornittagaataanut isertartut allattorsimaffianni takuneqarsinnaavoq, Karoline Jensen oqarpoq.
- Aalborgimi maannakkorpiaq kalaalerpassuaqarpoq, amerliartuinnarpullu. Ikiliartornissaallu naatsorsuutiginngilarput.
