Corona pillugu kisitsit Avannaata Kommunianut nutaarsiassatsialaasut
![](/sites/default/files/styles/image_934x467/public/article_images/testmaskine.jpg?itok=Uoosy5Go)
Upernavimmi Upernaviullu nunaqarfiini coronamik juulip ingerlanerani aggustillu aallartinnerani tuniluutingaatsiartoqarpoq.
Nunatsinni kommunini avannarpasinnerpaami tunillatsissimasunik maanna nalunaarsugaqanngitsoq, nun.gl-imit kisitsisit takutippaat.
Kingullermik ippassaq nutarterineq naapertorlugu tunillatsissimasut tallimat allassimapput, taakkuli maanna peqqisseqqissimapput.
- Kommune Qeqertalimmi Aasianni tuniluuttoqarfiusumi tunillatsissimasut aamma ikilipput: Tunillatsissimasut ullumikkut 15-iupput, taakkulu ippassaq 24-ugaluarlutik.
- Qeqqata Kommuniani Sisimiuni tuniluuttoqarfiusumi tunillatsissimasut ullumikkut 34-upput. Taakku ippassarmut sanilliullugit arfineq-marlunnik amerlanerupput.
- Kommuneqarfik Sermersuumi tunillatsissimasut ullumikkut arfineq-marluupput, ippassarlu arfineq-pingasuugaluarlutik.
- Kommune Kujallermi tunillatsissimasoqanngilaq.
Nunatsinni tunillatsissimasut maanna 56-iupput.
Sisimiuni ullualunni coronamik tunillatsissimasoqanngereerluni tunillatsissimasunik nutaanik sapaatip akunnerata siuliani paasisaqartoqarpoq.
Makkua ornissagukkit, malittarisassat naapertorlugit marloriarlutit tuikkut kapitinnikuussaatit imaluunniit coronamik tunillatsinnikuunnginnermut uppernarsaat, siisunerpaamik akunnernik 48-nik pisoqaassusilimmik tigummiassaatit:
-
Sutorniartarfiit, cafét, imerniartarfiit, diskotekit assigisaallu, silamilu nunaminertat taakkununnga atasut.
-
Kulturisiorfiit – soorlu illorsuit kulturisiorfiit, filmertarfiit, katersugaasiviit kiisalu inersuit saqqummersitsiviit.
-
Innuttaasut illuutaat assigisaallu.
-
Atuakkanik atorniartarfiit.
-
Illup iluani siamilu timersortarfiit – soorlu init inersuillu timersortarfiit, naluttarfiit, timigissarfiit arsaattarfiillu.
-
Nujaleriviit, tagiaasartut, pinnersarfiit assogisaallu.
Nunatsinni illoqarfiit annersaata tulliani nutaanik sisamanik tunillatsittoqarsimasoq marlunngornermi kingusissukkut nalunaarutigineqarpoq. Tunillatsissimasullu ilaat peqqinnissaqarfimmi sulisuulluni.
Coronalu Sisimiuni tuniluutilertorpoq.
Sisimiut katersortarfiani misissuisarfik ullumi ammarneqarpoq. Tamatuma siorna napparsimmavimmut misissortinniarnissaq kisimi periarfissaagaluarpoq - napparsimmavimmut siarnguttorpassuaqarnera pissutigalugu siarnguttut pingasunngornermi angummassinnaajunnaarput.
AAMMA ATUARUK Sisimiuni inuit marluk napparsimmavimmut unittut tuniluuttoqangaatsiartorlu
Tuniluuttoqarnera pissutigalugu Sisimiunut killilersuinerit sukannersut atuutilersinneqarput: Inuit amerlanerpaamik 20-t sumiiffimmi ataatsimi kisimik katersuussinnaatitaapput, tamanit ornigarneqarsinnaasuni tamani assersuutigalugu pisiniarfinni, napparsimmavimmi, kommunimi, bussini taxanilu qanermut assiaquteqartoqassaaq.
Neriniartarfinnut imerniartarfinnulluunniit iserniartut aamma tamakkiisumik akiuussuserneqarsimassapput imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik uppernarsaatissaqassallutik.
Sisimiuni meeqqat atuarfii aasaarnerani atuanngiffeqareernerani ullumi ammaqqittussaagaluarput. Coronmilli tuniluuttoqarnerata tamanna akornuserpaa, taamaammat Minngortunnguup Atuarfia aamma Nalunnguarfiup Atuarfia sapaatip akunnerata tulliani aatsaat ammassapput.
Killilersuinerit nutaat aggustip ulluisa 24-annut atuutissapput. Taakku tuniluuttoqarfiusunut Aasiannut, Upernavimmut kiisalu nunaqarfinnut qulingiluanut Upernaviup pigisaanut aamma atuupput.
Malittarisassat ilarujussui nunatta sinnerani qasukkarneqarnikuupput, tassa qanermut assiaquteqarnissaq piumasaqaataajunnaarlunilu katerinnissamut killilersuisoqarunnaarpoq.
Naalakkersuisut nunatsinni coronamut killiffik pillugu aqagu nalunaaqutaq ataatsinut tusagassiortunik katersortitsiniarpugut - tamanna maana knr.gl-ikkut malinnaaffigisinnaavat.