Vivian Sisimiuni napparsimmavimmut iluatsinngitsumik 77-eriarluni sianertoq
Vivian Møller Johansen ippassaq niaqorlullunilu nukimigut anniarpoq.
Taanna Sisimiuni tunillatsissimasunik sisamanik nutaanik ippassaq paasisaqarfiusumi najugaqarpoq – taamaammat erngertumik eqqarsalerpoq: coronamik tunillatsissimasumut qanillisimasinnaavunga?
Taanna Pinerluttunik Isumaginnittoqarfimmi sulisarpoq, tassanilu sulisunik inunnillu avataaneersunik ataatsimeeqateqaqattaartarpoq – tallimanngorpallu katittunukartussaavoq, taamaammat tunillatsissimannginnerluni paaserusuppaa.
Avannaata Kommunia: 19
Kommune Qeqertalik: 21
Qeqqata Kommunia: 4
Kommuneqarfik Sermersooq: 7
Kommune Kujalleq: 0
Sisimiuni peqqissaavimmut sianersinnaaneq ullumi nalunaaqutaq qulingiluanut ammarmata oqarasuaammut pingaarnermut 864211-mut sianeqattaalerpoq. Eqqornerusumik oqaatigalugu 77-eriarluni sianerpoq.
Sianernerali iluatsinngitsooqattaaginnavippoq.
Ataatsinut sianeqqigit
Nalunaaqutaq 10.14-inngortoq iluatsippoq, utaqqilaareeramilu sulisumik oqaloqateqarpoq.
- Misissortinnissannut inniminneerusullunga oqarpunga – nalunaaqutarli ataatsinut sianeqqissasunga oqarfigaanga, Vivian Møller Johansen KNR-imut oqarpoq.
- Taava aperivunga: Oqarasuaatimmi ataatsinut ajoqqillutik tassani iluatsitsinngikkuma? Akivaangalu: Allatut ajornaqaaq.
AAMMA ATUARUK Corona: Sisimiuni tunillatsissimasut nutaat sisamat
Taanna ullumikkut allanut attaveqarnani allaffimminiippoq – ataatsinullu sianeqqinnissaminut naammagittarniarpoq. Kamaateqarporli:
- Nuummi ullut tamaasa ammasartumik misissuisarfeqarpoq, inuit tassunga takkutiinnarsinnaapput. Soorunami Sisimiuni taamaattoqanngitsoq? Maani oqarasuaatikkut iluatsitsiniarluta ilungersortarpugut. Misissuisarnerup ilusilersugaalluarnerunissaa kissaatigaara, taanna oqarpoq.
Tunillatsissimasut nutaat sisamat
Sisimiuni ullualunni coronamik tunillatsissimasoqanngeriarluni nutaanik tunillatsissimasoqarneranik tusatsiakkat aallartipput, tunillatsissimasullu ippassaq paasineqarlutik. Tunillatsissimasut sisamat paasineqartut Naalakkersuisut ippassaq unnukkut nalunaarutigaat.
Sisimiuni coronamik tunillatsissimasoqarnera pissutigalugu peqqinnissaqarfiup matui matuneqartut peqqinnissaqarfiup Facebookikkut ullormi siusinnerusukkut nalunaarutigaa. Napparsimmavimmi uninngasut aamma pulaarneqarsinnaajunnaarput.
Nakorsiarniartullu peqqinnissaqarfimmut sianerlutik sulisunut isumaqatigiissusioqqaassapput.
Sisimiunilu tunillatsissimasunit sisamanit ataaseq peqqinnissaqarfimmi sulisuusoq ullormi kingusinnerusukkut paasineqarpoq.
Nunatsinni tunillatsissimasut maanna amerlangaatsiarput: Tunillatsissimasut maanna 50-iusut nunatsinni coronamik siullermik siorna marsimi tunillatsittoqaqqaarneranit aatsaat taama amerlatigipput.
Peqqinnissaqarfiup oqarasuaataanut siarnguttorpassuaqarnera ilungersunartoq Naalakkersuisut Facebookiminni ippassaq unnukkut nalunaarutigaat.
”Nutaanik tunillatsissimasoqarnera pissutigalugu oqartussat nunatsinni sumiiffinni assigiinngitsuni tunillatsissimasinnaasunik ujartuileruttorput. Tamanna pissutigalugu illoqarfinni nunaqarfinnilu eqqugaaffiusuni misissuinissamut piginnaasat ilungersuanarput.
Covid-19-imik misissortinniarlutik siarnguttut maanna amerlanerat pissutigalugu pinasuartumik napparsimasut peqqinnissaqarfimmut sianerniarnerat ajornakusoorsinnaavoq.
Taamaammat innuttaasut tunillatsissimanermik ersiuteqartut misissortinnissaat maanna erseqqissaatigineqarpoq. Inuit tunillatsissimasut ilaannut qanimut attaveqarsimasut taamaammallu misissortissanut oqartussanit attavigineqarumaarput”, Naalakkersuisut taama nalunaaruteqarput.
Tamannali Vivian Møller Johansenip isumaanut allannguinngilaq:
- Peqqinnissaqarfimmut attaveqarsinnaannginnera soorunami ernumassutigaara. Tamannami inuunermik naleqarsinnaavoq, taanna oqarpoq.
KNR-ip nunap immikkoortuani Sisimiuni peqqinnissaqarfik nassuiaateqartinniaraluarpaa. Taakkuli oqarasuaat tiguneq ajorpaat.
