Corona: Sisimiuni tunillatsissimasut nutaat sisamat
![](/sites/default/files/styles/image_934x467/public/article_images/20200402-160921-l_40mb-1.jpg?itok=bQXzIW1Z)
Sisimiuni piffissami sivitsulersumi tunillatsissimasoqanngereerluni inuit sisamat tunillatsissimasut paasineqarput.
Sumit tunillatsittoqarsimanera oqartussat ilisimanngilaat.
Naalakkersuisut Facebookikkut taama nalunaaruteqarput.
Tunillatsissimasunit marluk ilaqutariipput, ataatsillu alla tunillassimallugu. Tunillatsissimasulli marluk allat oqartussat paasissutissaataat naapertorlugu imminnut qanillisimanngillat.
- Taamaammat Sisimiuni tunillatsissimasunik ilisimaneqanngitsunik arlalinnik peqarsimassasoq ilimanaateqarpoq, Naalakkersuisut allapput.
Peqqinnissaqarfimmi sulisoq tunillatsissimasoq
Tunillatsissimasoq ataaseq peqqinnissaqarfimmi sulisuuvoq.
Nakorsiarlutit napparsimmaviliassaguit peqqinnissaqarfiup oqarasuaataanut 86 42 11-mut sianerlutik isumaqatigiissuteqaqqaassaatit.
Taamaammat allanik tunillatsittoqannginnissaa pissutigalugu malittarisasast arlallit atulersinneqarnissaat aalajangerneqarpoq.
Sisimiuni napparsimmaviup matuisa parnaaqqatinneqarnissaat ullumi siusinnerusukkut nalunaarutigineqarpoq.
- Sisimiuni Covid-19-imik tunillatsisimasoqarnera peqqutaalluni matut parnaarneqarput, uninngasunullu pulaarsinnaaneq unitsinneqarallarluni, Sisimiuni peqqinnisaqarfik Facebookikkut nalunaaruteqarpoq.
AAMMA ATUARUK Corona: Sisimiuni tunillatsissimasut nutaat sisamat
Peqqinnissaqarfimmi sulisoq akiuussutissamik kapitinnikuuvoq. Taamaakkaluartorli Deltamik tunillatsittoqarsinnaanera qasseeriarluni takutinneqarpoq.
Akiuussutisserneqarsimaneq akiuussutisserneqarsimannginnerlu - Naalakkersuisut oqarnerat naapertorlugit - akiuussutisserneqarsimasoq napparsimarujussuannginnerullunilu allanut tunillaannginnerusarpoq.
Tunillatsissimasut nutaat ullumikkut aqqaneq-marluk
Tunillatsissimasut ippassarmit nutaat arfineq-pingasut ullumi siusinnerusukkut nalunaarutigineqarput, taamaalillutik tunillatsissimasut 46-lerlutik.
Sisimiunili tunillatsissimasut nutaat ilanngullugit taakku maanna 50-iulerput, tunillatsissimasullu taama amerlatiginikuunngillat.
Ataasinngornermit tunillatsissimasut nutaat arfinillit Aasianniipput, ataaseq Qasigiannguani, ataaseq Nuummi maannalu sisamat Sisimiuni.