CO2-mik aniatitsineq coronavirusip ajornartoortitsinerani 17 procentimik annikilleriartoq

Coronavirusip nunarsuaq tamakkerlugu ajornartoortitsinera pissutaalluni gassimik CO2-mik silaannarmik kissakkiartortitsisartumik aniatitsineq annikilleriangaatsiarpoq.

Atuagassiap ilisimatusarnermut tunngasunik ilanngutassiaqartartup Nature Climate Changep misissuinerata marlunngornermi saqqummiunneqartup tamanna takutippaa.

Immikkut ilisimasallit Europameersut, USA-meersut Australiameersullu kisitsisit nunanit 69-ineersut misissorsimavaat.

Ukiup aallartinneranit apriilip aallaqqaataata tungaanut CO2 ullormut agguaqatigiissillugu 83 millionit tonsit aniatinneqartartoq nalunaarusiap takutippaa. Siorna kisitsisinut naleqqiukkaanni tamanna 17 procentinik annikilleriarneruvoq, CO2-mi ullormut aniatinneqartartoq siorna agguaqatigiissillugu 100 millionit tonsiummat.

AAMMA ATUARUK Coronaviruseqarnerani mingutsitsinikinnerusoqarmat Europami toqusut ikinnerusut

Nunarsuaq tamakkerlugu CO2-mik aniatitsinerup siornamut naleqqiullugu ukioq manna ataatsimut isigalugu 7 procentinik annikilleriarsinnaanissaa eqqoriarneqarpoq.

CO2-mik aniatitsinerup annikilleriarnera sorsunnersuup kingulliup kingorna aatsaat taama taava annertutigissaaq.

Nunalli assigiinngitsut ammaqqikkiartuaarnerat CO2-p aniatinneqartup annertussusaanut sunniuteqassaaq, aniatinneqartorlu ataatsimut isigalugu qanoq annertutigissanersoq tassani takuneqarsinnaassalluni.

Matusinerit ilaatigut timmisartut biilillumi amerlanerpaartaat angallakkunnaarnerannik kinguneqarput.