Coronaviruseqarnerani mingutsitsinikinnerusoqarmat Europami toqusut ikinnerusut
Coronavirusip ajornartoortitsinera pissutaalluni Europami nunani assigiinngitsuni suliffeqarfiit matoqqatinneqarput, tamannalu ilaatigut pissutaalluni mingutsitsinerit annikilleriangaatsiarlutik. Inuit ukioq manna maannamut toqusut siorna piffissap taamaalineranut naleqqiullugu 11.300-nik ikinnerupput.
Inuit 100 millionilikkaat angerlarsimaannarnerat pissutaalluni silaannarmik mingutsitsineq annikilleriangaatsiarpoq. Misissuinerni inernerit ullumi sisamanngornermi saqqummiunneqartut tamanna takutippaa.
- Europami innuttaasut qaammammi ataatsimi pujortarunnaarnerattut sanilliussinnaavat, Lauri Myllyvirta, Finlandimi misissuivimmeersoq, oqarpoq.
AAMMA ATUARUK Europami illoqarfissuarni matusani silaannaq minguinnerulertoq
- Ikummatissanik atuinerup annikilleriangaatsiarnerata kingunerisaanik silaannaap minguinnerulernerata inuit peqqissusaannut inuuniarnermullu iluaquteqarnera misissuinitta takutippaa, Myllyvirta oqarpoq.
Nunani 21-ni angallanneq assartuinerlu, suliffissuaqarneq aamarsuillu atorlugit kiassarnerup silaannarmik mingutsitsineq mmisissorneqarsimavoq, mingutsinerullu 12 procentinik annikkilleriarsimanera paasineqarluni.
