Canadamiu Keenan aataqqiiminit kingornussivoq: Qilaatersornerup immikkuullarissunngortippaatigut
- Coronamut nappaalareernerup kingorna pikialaartitsinerit ima ittut pisariaqartippagut. Tassa, ataatsimooqqilerpugut, Keenan Carpenter Canadamiit Nuummut tikeqqammertoq taama oqarpoq, taanna qilaatersortartuuvoq pikialaartitsinermullu Katuarpalaamut sapaatip akunnerani matumani peqataassalluni.
Qilaatersorluni pikialaartitsineq Qaanaamiit, Tasiilamiit, Sisimiuniit aammalu Nuummiit peqataaffigineqarpoq. Aammali Canadami Nunavummi Iqalunneersunit peqataasoqarpoq, taakkulu ilagaat Keenan Carpenter.
- Sumiiffinni assigiinngitsuneersut qilaatersornikkut periusaat assigiinngitsut erinarsuutaallu takussallugit tusassallugillu qilanaaraakka, Keenan Carpenter KNR-mut oqarpoq.
Taassuma aataqqiia qilaatersortartuusimavoq, kisianni kinguaariinni kingornunneqarani. - Aataqqiimmalu aataminit qilaatersorneq kingornussaraa, taanna oqarpoq.
- Tamanna uanga kinguaariinni allanngortippara, Keenan oqarpoq, taassumattaaq meeqqat inuusuttullu amerlanerusut qilaatersornermut soqutiginnilernissaat uummateqarfigaa.
Qilaatersornerup soqutigineqarnerulernissaanik 69-nik ukiulik qilaatersortartoq Qaanaameersoq Inukitsoq Sadorana aamma neriuuteqarpoq.
- Soorunami neriuppunga, qilaatersornermut soqutiginninneq anginerulerumaartoq, taanna Katuarpalaamik qulequtsikkamik pikialaartitsisoqarnerata nassatariumaagassaanik neriulluartoq taama oqarpoq.
Aaqqissuussarmi ataasinngormat aallartippoq tallimanngorpallu naammssineqassaaq.
Qilaatersorneq atajuartussaannartut pinagu aammali ineriartortinneqassaaq
Pikialaartitsineq kulturikkut illorsuarmi Nuummiittumi Katuami pivoq. Katuallu pisortaa Arnakkuluk Jo Kleist naapertorlugu, pingaartuuvoq qilaatersorneq kulturikkut kingornussassaannartut isigineqassanngitsoq aammali ineriartortitassatut isigineqartariaqartoq.
Taassuma eqqaavaa, ukioq kingulleq decembarip qaammataani qilaatersorneq UNESCO-p allattorsimaffiani kulturikkut kingornussassatut eriagisarialittut allattorsimasuutinut ilanngunneqarnera.
- UNESCO-miit isumaqatigineqarluni erseqqissaatigineqarpoq, nunarsuarmi kingornussassatut pingaarutilittut qilaatersornerup inissinneqarnissaa aammali ineriartortinneqarnissaa. Amerlaqisut qilaammik tigusinissartik ersigisarpaat, Arnakkuluk Jo Kleist oqarpoq.
- Neriuutigaara, suli amerlanerusut qilaammik tigusinissaminnut qunujunnaassasut, pisortaq oqarpoq.
Qilaatersorneq aamma kinaassutsimik isumaqarpoq
Canadami Iqalunni Nunavummiittumi najugalik Sandi Vincentip qilaatersornermut pikialaartitsineq ilikkagaqarnissamut periarfissaalluarnerarpaa, tassuunakkummi aggerfinniit allaneersut periusaat katersuuttussaapput.
- Qilanaaraara peqatigisatta avitseqatiginissaat, qanoq assigiinngissuteqarnerput immikkuullarissutsigullu takussavagut, taanna oqarpoq.
Taannami naapertorlugu qilaatersorneq aamma kinaassutsimik oqariartuuteqarpoq.
- Aalajangersimavunga qilaatersorneq ilinniarumallugu, taamaalillunga naggueqatigiittut Inuttut kinaassusera paasilluarumallugu, taanna oqarpoq.
Canadamiut kalaallillu kisimik qilaatersorluni pikialaartitsinermi kisimik peqataassanngillat. Aammali sapaatip-akunnerata naalernerani qilaatersortartoq Alaskameersoq tikissaaq, taannalu naatsorsuutigineqarpoq tallimanngorpat Katuami naggataarnersiornermi takutitsilluni peqataajumaartoq.