Nanortalimmi atuarfik saaluallaqarnera pissutigalugu matusoq

Nanortalimmi meeqqat atuarfianni saaluallaqarnera pissutigalugu, atuarfiup juullimi atuanngiffiup tungaanut matoqqanissaa pillugu, angajoqqaanut Nanortallip Atuarfiani meeraatilinnut allagarsiipput.

Allagaq Facebookikkut saqqummiunneqarpoq.

Atuarfimmili siaruaatingaatsiartoqarsimanngitsoq allakkami allaqqavoq. KNR-ip ukiup aallartisimalernerani oqaluttuaraa oqummik ajornartorsiortoqartoq, taamaalilluni atuarfik januaarimi matuneqartoq, aasamilu atuanngiffeqareernerani ammaqqittoq.

Inuit ataatsimoorfiini unnuiffiuneq ajortuni, saaluallaat siaruaannissaannut ilimanaateqarpallaanngitsoq, Ilisimasallit atuarfiup qullersaannut oqaluttuareersimalerput.

Eqqissisimaneq pingaaruteqartoq

Taamaakkaluartoq juullimi atuanngiffeqarneq sioqqutilaarlugu matuneqarnissaa atuarfiup aalajangiuppaa.

- Atuarfimmi siaruaatingaatsiarnissaa ilimanaateqarpallaanngikkaluartoq, sumiissusersinissai pisoqarfinnilu annikinnerusuni akiuiniarnissarput pingaartipparput.

- Atuartut ilinniartitsisullu toqqissisimanissaat kiisalu saaluallaat siammarternaveersaarnissaat akisussaaffigigatsigu taamatut aalajangiivugut, Nanortallip Atuarfia allakkami allappoq.

Atuarfiup matoqqanerani saaluallaat sumiissusersinissaannut akiorniarnissaannullu iluaqutissanik illersuutinik pisiortortoqassaaq, aamma taskit, oqorsaatit saaluallannik siaruarterutaasinnaasut pillugit qanoq iliuuseqartoqarnissaanik najoqqutassaliortoqassaaq. 

Atuartunut piffissap ilaani angerlarsimaffimmiit atuartitsisoqartariaqalissagaluarpat, angerlarsimaffimmi suliassanik piareersimasoqarumaarpoq.

Atuarfiup juullimi atuanngiffeqareerpat januaarip tallimaanni ammaqqinneqarnissaa, atuarfimmi qullersat naatsorsuutigaat, allakkallu naanerani saaluallaat peqqissutsimut akornutaanngitsut erseqqissaatigineqarpoq.