Atuarfik oquttoq: Atuartut ilinniartitsisullu siunissaat qularnartoq

Nanortallip atuarfia oqoqalermat ukioq manna januaari naalersoq matuneqarpoq. Atuartut Nanortallip timersortarfiani maanna atuartinneqartarput, tassanili atuartut ilinniartitsisullu nipimiuullutillu ukkassiniarnerat sunnerneqarpoq.

- Ernumanarpoq. Atuartuutitta taamatut atugaqartitaanera eqqarsaatigissagaanni ilaa atuarfik aamma oqumik eqqugaaqqasoq, ilinniartitsisullu atugarisaat eqqarsaatigalugit, ajorpoq. Pitsaanerusariaqaraluarpoq atugassarititaasut meeqqanut ilinniartitsisunullu, Augustinus Augustinussen Nanortallip Atuarfiani pissutsit pillugit oqarpoq.

Nanortalimmi atuarfik oqoqartoq paasineqarpat atuartut 173-it ilinniartitsisullu 20-t erngertumik nuuttariaqarsimapput. Aaqqiissutissarsiortoqarnerata nalaani utaqqiisaasumik atuartitsivimmi atuartitsisoqarpoq, taakkuli atuartitsivissatut naleqqutinngillat.

Atuartut ilaat assersuutigalugu timersortarfimmi atuartinneqarput – tamanna pitsaanngilaq, kisiannili pisariaqartumik aaqqiissutaalluni, Kunuk Simonsen oqarpoq.

- Tuaviornerpaamik atuartut sumiiffissaanik ujarlernikuuvugut. Tassa ullut marluk atorlugit nassaarinikuuarput. Maannakkut inissisimaffipput imaappoq Nanortallip illoqarfiani piffiit assigiinngitsut arlallit atorlugit atuartitsinerit ingerlanneqarput. Soorunami tusaasinnaavarsi ilaa nippaarissorujussuuvoq aamma atuartitsiniarnermi atuartullu ukkassiniarnerannut sunniuteqartukuluuvoq.

Pisoq asseqanngitsuunngitsoq

Nunatsinni atuarfiit pisoqaallutillu iluarsartuunneqartariaqarmata oqoqarnera ajornartorsiutaaleraluttuinnarpoq. Oqoqaleraangattamanna atuartunut ilinniartitsisunullu peqqissutsikkut ajornartorsiuteqalersitsisinnaavoq, assersuutigalugu sapigaqarneq, niaqorlunneq, anersaartorniarnikkut ajornakusoortitsineq.

Atuarfik oqoqarnera pissutigalugu aatsaat siullermeertumik matuneqanngilaq. Kommune Kujalliup Nanortallip Atuarfiata pisoqartaa oqoqartoq 2023-mi novembarimi aamma paasivaa.

Atuarfiup matuneqarnera ilinniartitsisut suliffimmi atugaannut aamma allannguingaatsiarpoq.

- Ataatsimut oqaatigissagaanni ilungersunarpoq. Takusinnaasarsi malillugu soorlu isuaniit isuanut tusaasinnaavagut. Taava atuartitsiniaraangatta nipimiuulluta ingerlasarpugut. Soorunami atuartut sungiussiartorput, uagullu tamakkiisumik atuartitsisinnaanngilagut, atuarfimmi ilinniartitsisoq, Egede Nielsen Simonsen oqarpoq.

Uteqqinnissaq neriuutigigaa

Atuartut ilinniartitsisullu peqqinnartumik atuartitsiviusumi avatangiisinut uteqqinnissaannut atuarfiup iluarsartuunneqarnissaa pisariaqarpoq.

- Naluuipparput massakkut siunissaq qanoq isikkoqarnersoq. Atuarfipput maannakkut pilersaarusiorneqarpoq iluarsartuutissallugu juulip ingerlanerani naammassissangavaat, atuarfiup pisortaa, Kunuk Simonsen oqarpoq.

Klassinut aalajangersimasunut uteqqinnissaq ilinniartitsisut akornanni aamma kissaatigineqangaatsiarpoq.

- Neriukkaluaqaagut piffissaq ungasippallaanngitsoq qaangiuppat klassitsinnut taavalu atuarfitsinnut utissalluta, Egede Nielsen Simonsen oqarpoq.