Atuarfik oquttoq matuneqartoq - tamatumuuna Ikerasammi
Ikerasammi anaanaq erloqivoq. Nunaqarfiup atuarfia oqoqartoq aggusti naalersoq matuneqarpoq, nunaqarfiullu katersortarfiani maanna atuartitsisoqartarpoq.
Heidi Therkelsenip meerai marluk Ole Løvstrømip Atuarfiani atuartuupput. Meeqqat oquttumiittarsimanerannik ersiuteqartarsimasut taanna oqarpoq.
- Atualeqqaaramik aggustimi meeqqakka misigisarput soorlu qasoqqakujullutik, taanna oqarpoq.
Angerlarsimaleraangamik piffissaq sivikitsoq sivitsulaarneraniluuniit aaqqeqqittartut, oqaluttuarpoq.
Meeqqat atuareeraangamik angerlaqqammiinnarlutik iluaallattartut taanna oqaluttuarpoq.
Angajoqaat iliuuseqapallapput
Atuarfiup oqoqarnera oktobarip 14-ianni uppernarsineqarpoq. Atuarfiullu oqoqarnera paasineqarsimatsiaannartoq atuartitsiffiujunnaartinneqarpoq.
Heidi Therkelsensip qitornai katersortarfimmi atuartariaqarput, katersortarfimmi meeqqanut 30-nut inissaqartutuaaavoq.
Ikerasammi atuartut 30-t nunaqarfimminni atuarfik atorunnaarlugu katersortarfimmi oktobarip 16-ianniit atuartinneqartalerput.
Atuartut angajoqqaavisa meeqqatik atuartikkunnaassallugit aggustip naalernerani aalajangertut, atuarfiup aqutsisua Manuella H. Therkildsen taama oqaluttuarpoq.
- Tassa taakkua ataatsimut isigalugu annertummata atuarfiup matuneqassaa ullormiit ullormut inassutigineqarpoq, taanna oqarpoq.
Tamannali Heidi Therkildsenip erneranut ajorpoq:
- Angajoqqaatut ilungersunarpoq. Sualummik ernera inimi nipituumiissinnaarpiannginnami, taanna oqarpoq nangillunilu:
- Taavalu katersortarfimmi atuarnerat akisuasorujuulluni. Ulloqartarpoq atuarusunnani, atuariartorusunnani nipit sakkortusarpallaaqimmata, taanna oqarpoq.
Iluarsartuussinissamik piumasaqarput
Atuartut nukarliit arfineq-pingasuniit ullup-qeqqata tungaanut aturtinneqartarput, atuartullu akullerniittut angajulliillu ullup-qeqqaniit sisamat tungaanut atuartinneqartarlutik.
Taamaammat atuarfik iluarsartuuneqassasoq Heidi Therkildsenip piumasaraa.
Atuarfitsik suliarineqassasoq taanna neriulluni oqarpoq. Katersortarfiummi atuarfittut atornera naammaginnanngiinerarpaa.
- Neriuppugut, atuarfiup qanganisartaaniissimagami oquk, taava matuneqassasoq. Nutaartaa atuarfittut atorsinnaanerussagatsigu.
Atuarfiup atuleqqinissaa ulluleruminaatsoq, tamannalu kipiluttunartoq, atuarfimmi aqutsisup Manuella H. Therkildsenip aamma oqaatigaa.
Ole Løvstrømip Atuarfia kisimi oqummik eqqugaanngilaq.
Tassaami Maniitsumi Atuarfik Kilaaseeraq atuartullu angerlarsimaffiat oqummik aamma eqqugaapput. Atuarfik iluarsartuunneqalereerpoq, 2025-milu naammassinissaa pilersaarutaavoq.
Kangaatsiami atuarfitoqaq oquttorujussuaq atuarfimmik nutaammik 2021-mi taarserneqarpoq.
Nanortalimmi atuarfiup nutaanngitsortaa aamma oqummik eqqugaalluni atorunnaartinneqarpoq. Atuartut ilinniartitsisullu atuarfiup nutaartaani oqoqanngitsumi maanna tattoqipput.
