Kujataani atuarfik oqummik aamma eqqugaasoq

- Ajuusaarnarpoq matusariaqalernera, atortugut, ulluinnarni sulinitsinni sakkussagut taqqamaniikkamik.

Kristine Gedionsen, Nanortallip atuarfiani ilinniartitsisoq oqarpoq.

Kommune Kujallermi sinnerlugu misissuinermi atuarfiup pisoqartaani oqoqartoq paasineqarpoq.

Taamaammat init atuartitsiviusut matuneqartut saniatigut atuakkanik atorniartarfik, ilinniartitsisut inaat, siunnersortit pisortaaqataasut allaffiat, ilinniartitsisut sulliviat, pedelit eqqiaasullu inaat aamma matuneqarput.

Akullerni atuartut 50-it ininut atuartitsiviusunut allanut nuutsinneqarput.

Isaterneqarli

Kirstine Gedionsenip oqarnera naapertorlugu atuarfiup pisoqartaata oqunnissaa pasitsaatigineqarsimasoq, taamaammat init allat nutserfigineqarnissaat piareersarluarneqarsimavoq.

- Piareersimalluarfigigatsigu, aamma paasissutissanik tuniorarneqarnitta nalaani ikioqatigiiipallalluta tigooraanikuugatta, taavalu ikioqatigiilluta pilersaarusiornikuulluta ingerlalluarpugut maannakkut, taanna oqarpoq.

Atuarfiup pisoqartaa – nutaamik sanaartortoqarsinnaaniassammat isaterneqartariaqassasoq, atuarfiup pisortaa, Magdaline Geraae isumaqarpoq.

- Nutarterneqarsinnaangilaq atorunnaasaaq. Tassa ima annertutigisumik oqummik eqqugaagami pisoqaanermillu nutarterneqarnissaa akilersinnaangilaq. Tattoqisaappugut, tassa naatsorsuutigaarput ingutserneqarpat allamik sanasoqassasoq, taanna oqarpoq.

Kristine Gedionsenillu isumaqatigaa, taassumalu pissutsit nalinginnaasunngoqqinnissaat qilanaarilereernerarpaa.

- Neriuutigaarput, aamma taamak nalaataqarluni pissutsit suut tamaasa allanngorneri aamma malunnarami sulinitsinni.

Nanortalimmi meeqqat atuarfianni atuartut 160-it 22-nik ilinniartitsisoqarput. Atuarfiup illutaa nutaajunerusoq oqummik eqqugaasimanngilaq.

Nanortalimmi atuarfik atuarfinni oqummik eqqugaasuni kisimiinngilaq. Maniitsumi Atuarfik Kilaaseeraq atuartullu inaat oqummik eqqugaasimasut KNR-ip ilanngutassiani arlalinni piffissami kingullermi allaaserinikuuaa.