Naaja Nathanielsen: Nunanit allanit aningaasaliinerit misissorneqarnissaat pillugit inatsit nutaaq pillugu isornartorsiuineq uniortoq

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfik inatsisissamik nutaamik ukiup matuma ingerlanerani suliaqarpoq.

Nunanit allanit aningaasaliinerit ilaasa misissorneqarnissaat pillugit inatsimmik taaneqartoq aqqutigalugu, nunanit allanit Kalaallit Nunaanni suliffeqarfinnut aningaasaliissutigineqartut misissorneqarlutillu akuersissutigineqartassapput.

Inatsisissatut siunnersuut Inatsisartuni novembarip aqqaneq-aappaanni siullermeerneqartoq, eqqartuussissuserisumit kalaallimit Sulisitsisullu pisortaannit  isornartorsiorneqartoq, KNR-imi pingasunngornermi allaaserineqarpoq.

Suliffeqarfiit aningaasaliiniarneranni piumasaqaatit suut naammassissaneraat inatsisissatut siunnersuummi erseqqinnginnera ilaatigut isornartorsiorneqarpoq.

Aammattaaq suliat naalakkersuisoqarfimmit qanoq suliarineqarnissaat nalornissutigineqarpoq.

Naalakkersuisup Naaja Nathanielsenip (IA) isornartorsiuineq maanna akissuteqarfigaa. 

Inatsit erseqqinngitsoq

Inatsisip erseqqinnginnera Naaja Nathanielsenip isumaqataaffiginngilaa. Inatsisip sukumiinerunnginnera immikkut tikkuussinertut isigaa.

Naak eqqartuussissuserisup KNR-ip oqaloqatigisaata inatsisip danskisoortortaa sukumiineruneraraluaraa, naalakkersuisoq isumaqarpoq inatsitsit taakku marluk assigiimmik inissisimasut. 

- Inatsit pineqartumut tunngaviulluni inatsisaassaaq, tamannalu pingaaruteqarpoq, inatsit pissutsini ilimaginngisani, soorlu aningaasaliinerni nunatsinnut innarliiniarnermik siunertaqarfiusuni atorneqarsinnaasussaagami.

Inatsilli ilaneqarsinnaavoq; nalunaarutinik taaneqartartunik.

Isornartorsiuisulli qaqutiguinnaq taamaaliortoqartarnerarpaat. Taamaaliortoqaraangallu iluaqutaarpiarneq ajorpoq. 

Ilanngussisoqarnissaa Naaja Nathanielsenip neriorsuutigaa, siulliillu ukiup nutaap aallartinnerani tusarniaaffigineqarumaartut.

- Inatsit atuutsilereeraangata nalunaarutinik suliaqarnerup sivisuallaarsinnaasarnera isornartorsiuineruvoq pissusissamisoortoq. Uanga suliassaqarfinni nalunaarutit arlallit suliarineqaruttulerput.

- Nunanit allanit aningaasaliinerit ilaasa misissorneqarnissaat pillugit inatsimmut tunngatillugu, inuussutissarsiortunut sammisunik ilitsersuutit paasissutissallu pisariaqartinneqartut suliarineqarumaarput.

Naalakkersuisut pissaaneqarpallaartut

Inatsit sukumiisumik suliaanngippat missingersuutit aallaavigalugit suliaqartoqarnissaa Sulisitsisut pisortaata isornartorsiorpaa. 

Taamaattoqarneratalu naalakkersuisumut akuersissuteqarnissamut akisussaasuusumut pissaaneqarpallaartitsilissasoq taanna isumaqarpoq. 

Tamatuminngalu isornartorsiuineq Naaja Nathanielsenip tupinnanngitsumik isumaqataaffigivallaanngilaa. 

Taanna isumaqarpoq tamanna pisortat ingerlatsinerannik paasinninnginnermut ersiutaasoq.

-Naalakkersuisut massakkut siunissamiluunniit namminneq iluarisatik aallaavigalugit aningaasaliinerit akuersissuteqarfigalugilluunniit itigartitsissuteqarfigisinnaanngilaat. Inatsisinik malittarisassanillu naalakkersuisutut malinnittussaatitaavugut. 

- Missingersuinerit sapinngisamik pinngitsoortinnissaat isumaqataaffigaara. Missingersugassaqartilluguli suleriuseq aalajangersimasoq malitassanngortinneqassaaq, taannalu avaqqunneqarsinnaanngilaq, innuttaasut suliffeqarfiillu assigiimmik pisussaagatsigit. 

Danskit oqartussaasui ilanngunneqarlik

Suliat suliarineqarneranni oqartussatut nakkutilliisussap, nunanit allanit aningaasaliinerit ilaasa misissorneqarnissaat pillugit inatsisissami nutaami allaqqannginnera eqqartuussissuserisumit ajornartorsiutitut nalilerneqarpoq. 

Tassani Inuussutissarsiornermik aqutsisoqarfik, CVR-imi nalunaarsuiffikkut kalaallit suliffeqarfiinik nakkutilliisuummat, nakkutiginnittussatut siunnersuutigineqarpoq.

Naaja Nathanielsenili isumaqarpoq, danskit oqartussaasui Kalaallit Nunaannut aningaasaliissutinik nakkutiginnittuussanngitsoq. 

- Kalaallit Nunaannut aningaasaliissutinik nakkutilliineq Kalaallit Nunaanni kalaallit nakkutilliinermi oqartussaasuinit suliarineqassaaq. Kalaallit susassaqarfiini allaffissornikkut suliassat nunatta avataanut suliakkiunneqarnissaat naalakkersuisunit pilersaarutaanngilaq, Naaja Nathanielsen allappoq.

Kalaallit Nunaanni politiit pisortaat tusarniaanermi akissuteqaasiornermut suleqataasinnaassaaq, danskit oqartussaasui susassaqartitaasut aallaavigalugit; tassanilu aamma Inuussutissarsiornermut Aqutsisoqarfik.

- Naalakkersuisut Kalaallit Nunaanni politiit pisortaat aalajangiisoqannginnerani tusarniaaffigisassavaat.  

Politiit pisortaat danskit oqartussaasuinik attuumassutilinnik, ilaatigut isertortumik paasiniaasartunik, Nunanut Allanut Ministereqarfimmik aamma Inuussutissarsiornermut Aqutsisoqarfimmik tusarniaasinnaanera tunuliaqutaralugu, tusarniaanermi akissuteqarnikkut suliap qulaajarnissaanut peqataasinnaavoq.

- Taakkua saniatigut (CVR-ip nalunaarsuiffianit paasissutissat, aaqq.) nunat tamalaanit paasissutissanik katersuiffiit paasissutissallu isertortumik paasiniaanermit pissarsiarineqarnikut takusinnaaneqarnissaat pisariaqartinneqassaaq.