Løkke: Brexitip sakkortunaarneqarsinnaanera piareersaateqarfigaarput

Avissaarnissaq pillugu isumaqatigiissut akuerineqanngilaq. Taamaalisoqarneratigullu Tuluit Nunaata killeqarfiini akitsuusersuisoqalissaaq EU-llu malittarisassiai Tuluit Nunaannit atorneqarunnaarlutik.
 
- Tamanna Danmarkimi suliffeqarfinnut Tuluit Nunaannut nioqquteqartartunut Tuluit Nunaanniillu nioqqutissanik eqqussuisunut ajornakusoortitsissaaq. Taamaammat piareersaateqarfigivarput. Akitsuusersuinermut tunngatillugu, aamma akileraarutinut tunngatillugu piareersaateqarpugut, danskit ministeriunerat Lars Løkke Rasmussen (V) tuluit inatsisartuisa marlunngormat unnukkut itigartitsinerisa kingorna taama oqarpoq.
 
- Tamannarpiaq pissutigalugu allamiunut ministeri (Inger Støjberg, aaqq.) Folketingimi partiinik oqaloqateqarpoq, tassunga killissappat, danskit Tuluit Nunaanniittut pitsaasunik atugaqarnissaat qulakkeerniarlugu immikkut ittumik inatsisiliortoqarsinnaanera pillugu.

AAMMA ATUARUK Mayip EU-mut ilaasortaajunnaarnissaq pillugu isumaqatigiissusiaa itigartitsissutigineqarpoq

Ministeriuneq isumaqarpoq tuluit inissisimaffigisartik qaangerniassagunikku suna kissaatiginerlugu oqaatigisariaqaraat.
 
- Taamaammat tuluit paaseqqaartariaqarpaat qanoq alloriaqqittoqassanersoq. Tamatumanilu soorunami naalaarumaarpugut kinguneqartussamillu isumaliutigalugu, ministeriuneq oqarpoq.
 
Tuluilli taama inissimalernerat Christiansborgimi aamma allatut isumaqarfigineqarpoq.
 
Dansk Folkepartiip siulittaasua Kristian Thulesen Dahl isumaqarpoq EU-p isumaqatigiinniarnerit aallarteqqittariaqarai.
 
- Isumaqarpunga isumaqatigiinniaqqittariaqarnerput erseqqilluinnartumik oqaatigisariaqaripput. Tuluit qeratasumik pissuseqarfigalugit nutaanik isumaqatigiinniartoqarnissaanik itigartitsineq kukkunertut isigaara.
 
- Misiliisoqanngippammi tamanna kukkunerujussuussaaq. Aaqqiissutissarsisoqanngippat Danmarkimi inuussutissarsiortunut Danmarkimullu pitsaassanngilaq, TV2 Newsimut taama oqarpoq.

AAMMA ATUARUK Tuluit politikeriisa Brexitimut isumaqatigiissut marlunngorpat taasissutigissagaat

Socialdemokraatit politikkikkut oqaaseqartartuata, Nicolai Wammenip, brexitip sakkortunaarneqarsinnaanera aamma ernumassutigaa.
 
- Ilungersunarluinnartumik inissisimavugut. Tuluit Nunaat isumaqatigiissuteqarani ilaasortaajunnaassappat EU-mut Danmarkimullu ajorluinnartumik kinguneqassaaq.
 
- Danmarkip avammut nioqquteqarnikkut milliarderpassuarnik annaasaqarfigisinnaavaa Danmarkimilu suliffiit tuusintillit aamma annaaneqarsinnaapput, Ritzauimut taama oqarpoq.
 
Naalakkersuisoq Ane Lone Bagger nunatta Tuluit Nunaannik niueqateqarneranut kingunerisassat pillugit ullumi kingusinnerusukkut oqaloqatigissavarput.

AAMMA ATUARUK Niuernermi isertittakkat 680 milliuunit annaaratarsinnaavagut