Brexit Nunarpullu Niuernermi isertittakkat 680 milliuunit annaaratarsinnaavagut
Tuluit Nunaannik niueqateqarnitsinni pitsaasunik atugaqarnissarput EU-mut niueqatigiinnissamut isumaqatigiisuteqarnnikkut, aalisarnermullu isumaqatigiissuteqarnikkut nunallu atlatsikup akianiit EU-mut atassuteqartut isumaqatigiissutaatigut aalajangersagaavoq.
Tuluilli 2019-imi marsimi ilaasortaajunnaarpapa, pissutsit allaanerussasut, nunanut allanut tunngasunut naalakkersuisoq, Ane Lone Bagger oqarpoq.
- Allanngussaaq, immikkut ittumillu isumaqatigiissusiornissamik immikkullunnit inissisimanissamik qulakkeerinngikkutta Tuluit Nunaannut niuernermi akitsuutinut akiliisalissaagut, Bagger suleqatitsinnit qallunaatut apersorneqarluni oqarpoq.
AAMMA ATUARUK Brexit nunatsinnut akisusinnaasoq
Tuluit ilaasortaajunaarnerisa kingunerisaanik EU-mi nunat Tuluit Nunaannut ammasunik killeqarfeqarunnaassapput Kalaallit Nunaatalu killeqanngitsumik niuersinnaanermut kiffartuussisinnaanernullu pisinnaatitaaffiinut, nunatta siorna 680 millionit koruurinik isertitsissutigisaanut, tamanna annikilliissaaq.
- Taamaammat Tuluit Nunaannut aalisakkanik tunisassianik eqqussuinitsinnut atugassarititaasut pitsaanerpaat sapinngisamik qulakkeerniartariaqarpagut, sulisuttalu Tuluit Nunaanni ministereqarfiit attavigilereerpaat.
Maannakkulli nutaanik isumaqatigiissusiortoqarsinnaanngilaq. Malittarisassammi malinneqartussaapput.
Tuluit Nunaat EU-mi suli ilaasortaagallartilluni nunanut allanut ilaasortaanngitsunut pisortatigoortumik isumaqatigiissuteqarniarsinnaanngitsoq, Ane Lone Bagger nassuiaavoq.
AAMMA ATUARUK Brexit pillugu isumaqatigiissusiornissaq Tuluit Nunaata iluatsinngitsooraa
Taamaammat Kalaallit Nunaata sinniisua danskit naalakkersuisui aqqutigalugit EU-mi kommissionimi attaviit atorlugit isumaqatigiinniarnerit maanna ingerlanneqarput.
Immikkulli inissisimanissamik isumaqatigiissutaasinnaasup qanoq isikkoqarsinnaaneranik maanna eqqoriassallugu siusippallaartoq, Naalakkersuisup erseqqissaatigaa.
- Siunissap siulittornissaa ajornakusoorpoq, kalaallilli niuernerannut ilinniartuinullu sunniutaasussat minnerpaatinniarlugit sapinngisarput tamaat sulivugut.
EU-p Tuluit Nunaatalu akornanni killeqarfiit matuppata, tamanna kalaallinut ilinniartunut aamma sunniuteqarsinnaasoq, Ane Lone Baggerip, kalaallisut apersorneqarnissamut piffissaqanngitsup, erseqqissaatigaa.
Ilinniartut danskisut innuttaassuseqarnertik atorlugu Tuluit Nunaanni najugaqarlutik ilinniartuusinnaapput, killeqarfiilli matuneratigut tamanna aamma allanngussaaq.
AAMMA ATUARUK Brexit pillugu isumaqatigiissusiornissaq Tuluit Nunaata iluatsinngitsooraa
