Trump toqoriaraluarneqareerlunili saqqummeqqaarami nuannattunnguaqartoq

USA-p præsidenterisimasaa Donald Trump, republikanerit nuna tamakkerlugu ataatsimeersuarfiannut apuukkami nuannattunnguaqarpoq.

Siutaa mattuserneqarsimasoq takuneqarsinnaavoq.

Trump arfininngormat toqoriaraluarneqarmalli tamanut siullerpaamik saqqummerpoq.

Trump ataatsimeersuarfimmut iserami oqaluttarfiup nalaanukanngilaq, tusarnaariartulli akornannut ingippoq, namminerlu tullersortissamisut toqqakkami J.D. Vancep sanianut ingilluni. J.D. Vance præsidentip tullersortissaatut republikanerit ataatsimeersuarneranni toqqarneqarpoq.

Trump ataatsimeersuarfiusumut iserami ersaartaanneqarpoq, ataatsimeersuariartullu suaartaapput "USA, USA, USA".

Republikanerit USA-mi naalagaaffimmi Wisconsinimi illoqarfissuarmi Milwaukeemi ataatsimeersuarput.

Donald Trump republikanerit sinnerlugit præsidentimut ukioq manna novembarimi qinersisoqarnissaanut sassartitassatut pisortatigoortumik tassani toqqarneqarpoq.

Trumpip republikanerit sinnerlugit qinigassanngortinneqarnini ataatsimeersuarnerup ulluisa kingullersaanni qujassutigissagaa naatsorsuutigineqarpoq.