Tusagassiorfik: USA Trumpip toqunneqarnissaa pillugu paasissutissaateqarpoq
USA-p præsidenterisimasaata Donald Trumpip qoqassilluni Iranimiunit toqunneqarnissaa pillugu paasissutissat USA-p isertortumik paasiniaasartuisa sapaatit akunnerisa kingulliit ingerlaneranni pissarsiarisimavaat.
Donald Trump arfininngormat toqoriaraluarneqareersorlu nutaarsiassaqartitsivik CNN taama allaaserisaqarpoq.
Præsidentip illorsua paasissutissat nutaat pillugit oqaaseqarusunngikkallarpoq, Trumpilli arfininngormat toqoriaraluarneqarnera nunanit allaneersunut tunngassuteqannginneranut takussutissaqartoq oqaatigalugu.
Tunngavissaqarani pasilliinerusoq Iranip oqaatigaa.
Iranimiut sakkutuuisa naalagaasa ilaata Qassem Soleimanip toqunneqarnissaa Trumpip præsidentiunermi nalaani 2020-mi naalakkiutigisimammagu Iranimit akiniarneqarnissaa USA-p ukiualunni ernummatigisimavaa.
- Trumpip aqutseqataanut sioorasaaruteqartarnerit ukiualunni nakkutigeqqissaarnikuugivut qasseerpassuariarluta oqaatigisareerparput, Adrienne Watson, præsidentip isumannaallisaanermut ataatsimiititaliaata oqaaseqartitaa præsidentip illorsuanit oqarpoq.
Paasissutissat tamakku Trumpip qineqqusaarnermut ataatsimiititaliaanut tunniunneqarnikuupput.
