Danmarkimi ministerip Troels Lundip USA-llu illersornissamut ministeriata Issittoq ataatsimiissutiginiaraat

USA-p illersornissamut ministeriata Danmarkip illersornissamut ministerianik Troels Lund Poulsenimik(V) ataatsimeeqateqarnissani kissaatigisimavaa.

Troels Lund Poulsen nunat killiit illersoqatigiiffiata NATO-p Bruxellesimi qullersaqarfiani ataatsimeereerluni Danmarkimi nutaarsiassaqartitsivinnut pingasunngornermi taama oqarpoq.

- Issittoq oqaloqatigiissutigingaatsiassagunarparput, Troels Lund Poulsen oqarpoq, Ukrainellu ataatsimiinnermi aamma oqallisigineqarnissaa naatsorsuutigalugu.

Ukrainep illersorneqarnissaa pillugu nunat killiit illersoqatigiiffianni NATO-mi ataatsimiittartoqatigiinni, Ramstein-gruppenitut aamma ilisimaneqartumi, ataatsimiittoqarnissaa sioqqullugu taama pisoqarpoq.

- Ataatsimiinneq sivisunavianngilaq, ilasseqatigiinnerunerussalluni, Troels Lund Poulsen oqarpoq.

USA-p Kalaallit Nunaannik soqutiginninnerata ataatsimiinnermi oqallisigineqarnissaa Danmarkip illersornissamut ministeriata naatsorsuutiginngilaa.

Issittumili ataatsimut isigalugit pissutsit oqallisigineqarumaartut illersornissamut ministerit marluk taakku naatsorsuutigaat.

Danmarkip illersornissaqarfiata Issittumik naammattumik illersuisinnaannginneranik USA-p oqarnera ilumoortortaqarsinnaasoq, Danmarkimi naalakkersuisut erseqqissaatigaat.

Issittumi sillimaniarnerup ataatsimut isigalugu nukittorsarneqarnissaa, NATO-p qullersaata Mark Ruttep taassuma saniatigut sulissutigaa, USA-lu tassani aamma ilaatinneqassalluni. Taama aaqqiisoqarsinnaanissaa neriuutaavoq.