Mayip EU-mut ilaasortaajunnaarnissaq pillugu isumaqatigiissusiaa itigartitsissutigineqarpoq

Tuluit maannamut naalakkersuisorinikuusaasa akornanni oqaluttuarisaanermi aatsaat taama ersaritsigisumik ajorsartitsisoqarpoq. Tusagassiorfiit arlallit taama allaaserisaqarput.

Pissutsit nutaat aallaavigalugit siunnersuutinik piviusorsiortunik nutaanik EU-mut maanna saqqummiussiniarnini, Theresa Mayip taasisitsereernerup kingorna oqaatigaa.

AAMMA ATUARUK Tuluit politikeriisa Brexitimut isumaqatigiissut marlunngorpat taasissutigissagaat

Mayip naalakkersuisuisalu inatsisartuni taama ajorsartinneqarnerat, 1920-kkunnili aatsaat taana ersaritsigisoq, partiip illuatungiliuttup Labourip siuttuata Jeremy Corbynip oqaatigaa:

- Isumaqatigiissusioqqaarani EU-mi ilaasortaajunnaarnissaq pillugu siunnersuut maanna taamaatiinnarneqartariaqarpoq, Corbyn ilaatigut oqarpoq.

Mayip naalakkersuisuinullu tatiginnikkunnaarnermik aqagu pingasunngornermi taasititsiniarnini pilersaarutigigaa, Corbynip ilanngullugu oqaatigaa.

Pissaanerup Corbynimut ingerlateqqinneqarnissaa isumaqataaffiginagu, Mayip ministeriisa ilaat oqaatigaat.

AAMMA ATUARUK Ny aftale sikrer Færøerne frihandel efter Brexit

Konservatiivit sinnerlugit qinikkat ilaat, EU-miiginnarnissamillu isumaqataanngitsut, tuluit EU-mut ilaasortaajunnaarnissaat pillugu allatut isumaqatigiissusiornissaq akerliuffiginiarpaat. Mayip maannamut siunnersuutaa itigartitsissutigineqareersorlu taama oqarput.

EU-mik niueqatigiinnikkut nutaamik isumaqatigiissusiortoqarnissaa, Nunalluunniit tamalaat niueqatigiinnikkut suleqatigiiffiata WTO-p piumasarisai naapertorlugit EU-mi ilaasortaajunnaartoqarnissaa, taakku orniginartinneruaat.

/ritzau/Reuters