Ukiuni 25-ni nutarterneqanngitsoq: Biilersinnaanermut ilinniummik nutaamik atuagaqalilersoq
Biilernermut ilinniarnermut atuakkami nutarterneqanngitsumi qitequteqarnissaq allassimanngilaq.
Biilertillunilu oqarasuaammik tigummiaqaqqusaanngitsoq meeqqallu 135 centimeterinit mikinerusut autostolini tassa biilini meeqqat issiavianiittarnissaat allassimanngilaq.
Oqaatsit allat atorlugit: Kalaallit biilersinnaanermut ilinniarnermut atugaat nutarterneqartariaqarpoq. Taanna 1994-imili nutarterneqanngilaq, taamaammat atuagaq nutaaq nutartigat piariinngajalersoq, danskit angallannermut ministeriat, Ole Birk Olsen (LA) folketingimi ilaasortamut, Aaja Chemnitz Larsenimut (IA) akissuteqarluni paasissutissiivoq.
1994-ip kingorna attaveqaqatigiinneq pingaartumik Nuummi ineriartungaatsiarsimavoq inatsisillu aamma nutarterneqarsimallutik.
AAMMA ATUARUK Qimmit qimuttut atorneqaqqusaaneri ministerip erseqqissaatigigaa
Kalaallit Nunaanni Politiini angallannermut tunngasunik ilisimasallip, Hans Peter Mørchip atuakkap nutarterneqalernera nuannaarutigaa.
- Biilersinnaanermut ilinniarnermi atuakkap 1994-imili nutarterneqarsimasup imarisai ajunngikkaluarput, immikkoortulli aqqanillit amigaataapput. Taamaammat immikkoortut aqqaneq-marluk nutarterneqarnissaat siunnersuutigalugit, Angallannermut Aqutsisoqarfimmut nassiuppagut, Hans Peter Mørch KNR-imut oqarpoq.
Biilit qulliisa ikinnissaata eqqaamanissaat nutarterneqartumi ilaasussatut kissaatigineqartut aqqanillit akornanniippoq.
Biilersinnaanermut ilinniarnermut atuagaq maanna piusoq aallaqqaammut nittartakkatigut pissarsiarineqarsinnaaleqqaassaaq, taamaammat Angallannermut Aqutsisoqarfiup nittartagaani kalaallisut danskisullu allassimasoq pissarsiarineqarsinnaalissalluni.
AAMMA ATUARUK Qamutit oqimaannerit angallateruttorfiup nalaanit peerniarneqarput
Tamatuma kingorna Kalaallit Nunaata Politiivi suleqatigalugit biilersinnaalernissamut ilinniarnermut atuagaq nutarterneqassaaq, taamaalilluni Nunatsinni angallannermut malittarisassat tamarmik malillugit suliarineqassalluni, angallannermut ministeri, Ole Birk Olesen (LA) paasissutissiivoq.
Biilersinnaanermut ilinniarnermi atuagaq nutartigaq Angallannermut Aqutsisoqarfiup nittartagaani upernaamiit pissarsiarineqarsinnaalissasoq ministerip naatsorsuutigaa.
Kalaallit Nunaanni angallannermi malittarisassani allanngortoqaraangat allannguutit nittartakkami nutarterneqartassapput. Taamaalilluni Kalaallit Nunaanni biilersinnaanermut ilinniartitsisut ilinniartullu nutartikkamik pissarsisinnaajuaannassallutik.
