B-52-ip 1968-imi ajunaarnerata kingorna piniartut tallimat taamaallaat missorneqarput

Amerikamiut timmisartorsuata qaartartunik usillip 1968-mi Pituffiup eqqaani nakkarnerata kinguneranik, tamaani saliisut kingusinnerusukkut assigiinngitsunik timimikkut nappaateqalerlutik tamanna toqqutigaat?

Naamik taamaattoqanngilaq, taama isumaqarput innuttaasut peqqissusaannik naalagaaffiup misissuisoqarfiani ilisimatuut pingasut, taakkununnga ilaalluni Aalborgip Napparsimmaviani nakorsaaneq, Jens Peter Johansen, aviisimi Politikenimi allaaserisaminni, oqarlutik tamanna uppernarsineqarsinnaanngitsoq.

Aap, taamani saleeqataasut aamma kalaallit piniartut napparsimalersimaneri tamatumunnga attuumassuteqarput. Taama isumaqarpoq, Qaanaami peqatigiiffimmik 'B-52'-imik pilersitseqataasut ilaat, Uusaqqaq Qujaukitsoq oqarlunilu misissuinerit uppernanngitsuusut.

- Misissuisuusaarnersuaq tamanna ingerlanneqarmat Avanersuarmiut tamatta peqataatinneqarpugut. Apersuinerinnarli atorlugu tamanna taamani ingerlanneqarpoq, Uusaqqaq Qujaukitsoq oqarpoq.

Piniartut 25-t 1968-imi timmisartorsuup nakkarnerata kingorna ajunaarfimmut takkuteqqaartuusut ilaat, tallimat arfinillilluunniit aavisa quuisalu misissorneqarnerat 1992-imi pisimasoq, Aalborgip Napparsimmaviani nakorsaanerup, Jens Peter Johansenip KNR-imut oqaaatigaa. Taanna danskit naalagaaffiannit misissuiartortinneqartoq. Taanna ima oqarpoq:

- Piniartut ilaat taamani Qaanaami najugaqartut tallimat arfinillilluunniit uanga nammineerlunga misissorpakka. Taamaallaat ataaseq timimigut nappaateqarpoq allalli plutoniumip pilersitaanik qinngulanernik radioaktiviusunik timaaniittoqarani, Aalborgip Napparsimmaviani nakorsaaneq, Jens Peter Johansen oqarpoq.

Nakorsaaneq taama oqaraluartoq, Uusaqqaq Qujaukitsoq siunnersuuteqarpoq, misissuinerit sukumiinerusut maanna aallartinneqartariaqalersut, tassa saleeqataasimasut timaat ilivermit qaqillugit misissorneqartariaqartut oqarluni.

- Tassa tamanna ullutsinni ajornarunnaarsimavoq, tassa maanna ilisimaneqarpoq nunani allani toqoreersimasut timaat ilivermit qaqillugit misissorneqartartut. Tamannalu aamma Nunatsinni pisinnaalluarpoq, Uusaqqaq Qujaukitsoq oqarpoq.

Taanna aamma KNR-imut oqaluttuarpoq, Pituffiup eqqaanilu aalisakkanik pisarineqartunik Avanersuarmiut nerisaqarnissaat 2008-mili inerteqqutaalersoq Avatangiisit pillugit Naalakkersuisoqarfimmit inassuteqartoqarneratigut. Tamannalu eqqarsarnartoqartoq Uusaqqaq Qujaukitsup oqaatigaa.