Ikuallannermi ajunaartoqarnerata kingorna: Avannaata Kommuniata inatsit unioqqutippaa

Avannaata Kommuneata nunaqarfiini arlalinni upalungaarsimanissamut malittareqqusaasoq minnerpaaffissaaluunniit malissimanngilaa, sillimaniarnerullu tungaatigut taama inissisimasoqaraluartoq aamma immikkut ittumik akuersissummik tamanna pillugu qinnuteqartoqarsimani, naak aamma inatsimmi piumasaqaataagaluartoq taamaattoqartillugu qinnuteqartoqartussaasoq.

Kommunep iluani pissutsit taamaanneri qulaarneqarput Upernaviup avannaani angutip 45-nik ukiullip inuuneranik naleqartumik illu ikuallareersorlu.

- Nunaqarfinni taakkunani qatserutinik amigaateqartoqarnersoq nalugatsigu immikkut ittumik qinnuteqarsimanngilagut, Avannaata Kommuniata borgmesteria Palle Jerimiassen KNR-mut oqarpoq.

Inatsimmi naapertorlugu, nunatsinni illoqarfinni nunaqarfinnilu qatserutip annertussusaa qatserisartullu qanoq amerlatigisinnaassusai eqqarsaatigalugit isumannaallisaanermut piumasaqaatit minnerpaaffilerneqarsimapput.  

Nutaarmiut 60-t missaanni inoqarpoq, nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

Inatsimmik uniuisoqarnerani ilisimasakinneq patsisaasoq

Qatserisartoqarsinnaassuseq qanorlu atsigisumik qatseruteqarsinnaanermut illoqarfiup nunaqarfiullu inoqassutsimigut annertussusaa apeqqutaalluinnarpoq.

Piumasaqaataasullu ataallugit pissutsit ippata kommune pisussaavoq immikkut ittumik qinnuteqartussaalluni. Matumani soorlu atortunut assartuutissaqanngippat imaluunniit nunaqqatigiit agguaqatigiissillugit killeqarpata nunalluunniit isorartussusaa matumani akimmisaarutaalluni pisoqarpat.

Immikkulli qinnuteqartussaatitaaneq Avannaata Kommuniata qinnutigisimanngilaa. Tamatumunngalu patsisiginerarneqarpoq, Avannaata Kommuniani kommunalbestyrelset ilisimasimanngimmassuk kommunep nunaqarfiini arlalinni qatserutinik qatserisartunillu amigaateqartoqarnera.

2021-mi juunip qaammataani Ukkusissani illu ikuallammat inuit pingasut ajunaarput, tamatuma kingorna Avannaata Kommuniata upalungaarsimanissamut tunngatillugu akisussaaffigigaa uppernarsarneqarpoq, najukkani tamani akisussaaffigisamini isumaannaallisaanermut atortutigut qulakkeerinnittussaanini.

- Ilisimatinneqarnikuuvugut kommunep illoqarfiini nunaqarfiinilu isumannaallisaaneq ajunngitsumik ingerlasoq. Tassalu taannaavoq aallaavigisarput, sapaatip-akunnerata siuliani Nutaarmiuni ikuallattoqarnissaata tungaanut. Paasivarpummi Nutaarmiuni, Naujaani aammalu Qeqertani Qaanaap eqqaani qatserisartoqaranilu qatseruteqarsimanngitsoq, Palle Jerimiassen nassuiaavoq.

Borgmesterip oqarnera naapertorlugu, upalungaarsimanissamut atortutigut kommune aqutsilluarnerarneqaraluartoq qanoq ililluni killormuanik pisoqarsinnaanersoq borgmesterip akisinnaanngilaa.

- Uagut nammineerluta inuttut ilumut taamaattoqannginnersoq misissoriartugassarinngilarput, suleqatitsinnit ilisimatinneqartussaavugut taamaattoqannginnersoq taamaattoqarnersorluunniit, suleqatigummi tatigisussaavagut, taamaaliorpugullu, borgmesteri Palle Jerimiassen KNR-mut oqarpoq.

Borgmesterip pisuussut akisussaaffigaa

Nutaarmiuni inuup inunneranik naleqartumik ikuallattoqareernerata kingorna, qatserisartut peqatigiiffiata siulitaasuata Poul Olsenip Avannaata Kommuniani upalungaarsimanissamut pisortaq isornartorsiorpaa:

- Pisortatut akisussaasuusup nalunngittussaagaluarpaa, nunaqarfinni atorsinnaasunik qatseruteqarnissaq qanoq pingaartigisoq aammalu qatserisartunik ilinniarsimasunik peqartitsisussaallutik, tupinnaqaaq oqarsinnaammat sumiiffinni pineqartuni qatseruteqannginneranik ilisimasaqannginnerarsinnaammat, nammineruna pisortatut akisussaaffii, Poul Olsen oqarpoq.

Taama ipitsisigiumik uparuaasoqaraluartoq tamanna Palle Jerimiassenip akuersaanngittuarsinnarpaa, taannami oqarpoq sulisuni tatigilluinnarini – aamma upalungaarsimanerput pisortaq pineqarpat.

- Qatserisartut peqatigiiffiata siulittaasuata (Aaqq.: Poul Olsen) sulisutsinnik tatiginninnginnerminik suaaruteqarnera suliamik naammassinnissinnaanginneranik ersersitsivoq, Avannaata Kommunia Palle Jerimiassen KNR-mut oqarpoq.

- Kommunalbestyrelse kommunemi upalungaarsimanissanut tamanut akisussaasuuvoq, naggataatigullu uanga akisussaaffigaara inatsisip malinneqartussaaneranut malititsisussatut, Avannaata Kommuniani borgmesteri Palle Jerimiassen oqarpoq.

KNR-p Avannaata Kommuniani upalungaarsimanermut pisortaq akisussaasuusoq oqaaseqartinniaqattaaraluarpaa, suliarlu pillugu oqaaseqarumanngilaq, taarsiullugulu borgmesterimut Attaveqaammullu suliaqartumut innersuussilluni.

Tassalu imaappoq apeqqutigiumasarput sooq qatseruterutinik sumiiffinni pineqartuni peqartoqannginnera taassuminnga akineqanngilaq. Palle Jerimiassenili akisussaanerarpoq isumannaallisaanermullu inatsisit piumasaqaataasut unioqqutinneqarsimaneri oqaatigalugu.

Pitsanngorsaasoqassaaq

Palle Jerimiassenip aamma neriorsuutigaa, upalungaarsimanermut tunngatillugu kommunemi pitsanngorsaasoqassasoq aammalu aallartereernerarlugu.

- Naujaani maanna tallimanik qatserisartoqalerpoq aammalu Nutaarmiuni pingasut. Qatserummik aamma Qeqertarnut assartuisoqassaaq qatserisartoqarnermullu tunngasumik nunaqarfimmi paasititsiniaassalluta.

Taanna aamma oqarpoq, kommune maanna upalungaarsimanissaq pillugu allattorsimasuuteqalersoq, tassa nunaqarfinni illoqarfinnilu upalungaarsimanissaq pillugu allassimasoqalersoq. Taannalu naapertorlugu, upalungaarsimanissamut suliaqartut angalassapput atortullu pissusissaatut atorneqarnersut qulakkiissallugu.

Tamatuma saniatigut kommunemi upalungaarsimasoqarnissaanut atugassanik aningaasarpassuarnik aningaasaliisoqassaaq, taama suliniartoqalerpoq taamani ukiup aappaata qeqqata matuma siorna Ukkusissani ikuallattoqarmalli.

- maannamut aningaasarpassuit atoreersimalerpagut. Aningaasartuutaasussallu saniatigut upalungaarsimanissamut atugassanik aamma 20 mio koruuninik immikkoortitsereerpugut, borgmesteri oqarpoq. 

Matumani ilanngunneqarlutik kalerrisaarutit, majuartarfiit qatserisartoqarfiit biilit qatserutitallit taamatuttaaq pikkorissartitsinermut ilinniaqqinnermullu aningaasat atugassat aamma qaffanneqarlutik.

- Sulili amigaateqarpugut, taannaluuna maanna aaqqinniarsarigipput, borgmesteri oqarpoq.