Ukkusissani ikuallattoqarmat imermut pumpit marluk atorsinnaanngitsut
Ukkusissarmiu, Ludvig "Looqi" Geisler ikuallattup eqqaani ikiuullunilu najuuppoq. Taassuma qatserisartut pumpinik marlunnik imarmik milluaatitsineq ajulertut isigai.
- Apuuppunga pumpi aallartissimagaat kisianni imermik millussineq ajulertoq, taanna oqarpoq itisiliivorlu:
- Ilaasa qatserutip aappaata pumpia aangamikku taannarsuaq aamma aallarsinnaangitsoq.
Ludvig "Looqi" Geislerip imermut pumpit pissusissamisut atorneqarsinnaannginnerat isornartorsiorpaa.
- Ajortorujorujussuarnik atortoqarput. Isornartorsiugassarujussuupput uparuaannarnagit. Qullersanit nakkutiginninneq ersarinnerusariaqarpoq.
Taanna aamma oqaluttuarpoq, nunaqarfimmiut ikuallattumik qamisaanermi qattanut dunkinullu imertartorlutik ikiuuttut.
Atortut misissorneqassasut
Avannaata Kommuniani upalungaarsimanermut pisortap, Isak Pjettursonip, imermut pumpit marluk atorfissaminnut atorsinnaasimannginnerat uppernarsarpaa.
Pumpit upernaaq misilinneqaramik ajoquteqarsimanngitsut taanna oqarpoq. Atortulli tallimanngormat atorsinnaanngillat.
Upalungaarsimanermut pisortaq naapertorlugu, imermut pumpit marluk misissugassanngorlugit Uummanniaanneqarput, sunali akornutigineraat suli paasineqanngilaq.
- Eqqarsariarnarpoq. Kisianni aamma nalunngilarput atortut sukkulluunniit ajortissinnaasartut. Taavalu taanna pinngittoorniarsaralugu Avannaata Kommuniani nunaqarfiit illoqarfiillu tamaasa eqqarsaatigalugit tjekliste sanassuarput. Tassa imaappoq, atortut pitsaassusiinik nalunaarsuiffik, Isak Pjetturson oqarpoq.
AAMMA ATUARUK Ikuallattumik paasiniaaneq: Misissuisartut Ukkusissanut aqagu tikissasut
Taanna naapertorlugu qatserutit slangitai 39-it Ukkusissani atoriaannaallutik piareeqqapput, taakkunanngalu 16-it qamisaaniarnermi tallimanngormat atorneqarput.
Pinerluttoqarsimasinnaaneranik misissuisartut nakorsarlu toqusunik misissuisartoq Ukkusissanut ullumi tikissapput. Taakkua ikuallattumut paasiniaanermi ikiuutissapput.
Minnerpaamik inuk ataaseq ajunaartoq marlullu ajunaarsimassagatinneqartut politiit KNR-mut siusinnerusukkut paasissutissiipput.
