Ikuallattoqarnerani ajunaartoq: Nutaarmiuni qatserisartoqaranilu qatseruteqanngilaq

Nunatsinni illoqarfiit annersaanni Nuummi qatserisartut nutaarsuarnik atortorissaaruteqarput.

Nunattali ilaani inoqarfiit ilaanni qatserisartoqaranilu qatserinermi atortussaqanngillat.

Nutaarmiuni illu ikuallannerani angut 45-nik ukiulik februaarip qulinganni ajunaarpoq.

Nutaarmiuni illu ikuallammat nunaqarfimmiut iliuusissaaleqisimaqisut, Nutaarmiuni najugalik, Mina Heilmann KNR-imut oqaluttuarpoq.

- Inuinnaat ornikkaluarpaat qanoq ilioriarsinnaanagu ikummalereerami, isikkanernut qiteqqutinngitsoq nungoreerpoq taanna illu, Mina Heilmann oqarpoq.

Taassuma oqarnera naapertorlugu Nutaarmiuni qatserisartoqanngilaq.

Qatseruteqanngitsoq upalungaarsimanermut piortap nassuerutigigaa

Tamanna Avannaata Kommuniani upalungaarsimanermi pisortap, Isak Pjetturssonip aamma uppernarsarpaa.

- Aap, Nutaarmiuni qatserisartoqanngilaq. Tassa imaappoq Nutaarmiuni pisoq sanngiittumik inissisimaffigaarput, paasitinneqarpugut taamatut atortoqanngitsut qatserisartoqaranilu.

Taamatullu nunaqarfimmi 30 tungaannut inulimmi qatserisartoqannginnera kiisalu qatserinermi atortorissaaruteqannginnera ilaatigut inuup inuuneranik akeqartoq takunneqqaartuusup Mina Heilmannip imaannaannginnerarpaa:

- Amiilaarnartorsuuvoq uanga kalerrisaarigama nunaqqatinnut, isigalugu uanni imaannaanngilaq, taanna oqarpoq.

Soormiuna nunaqarfimmi uani Nutaarmiuni qatserisartoqaranilu qatserinermi atortoqanngitsoq?

Tamanna marlunnik peqquteqartoq, upalungaarsimanermi pisortaq nassuiaavoq:

- Tassa taanna akiuminaatsilaarsinnaavara, kisianni ukiut kingulliit kommunip iluani inuttassaaleqisunut ilaavugut aamma qatserisartut, taava qulakkeersinnaanatigu qatserisartut tamakkiisut piginissaat. Avannaata Kommunia aamma nunaqarfikkaajuvoq aalisartoqarfissuullunilu, ilaatigut aamma tassanngaanniik aallerniarneq qatserisartussanik ajornarsinnaasarluni, Isak Pjettursson oqarpoq.

Nutaarmiuni qatserisartoqanngitsumi ikuallattoqarnerani inuullu ajunaarneranik kinguneqartumi taama pisoqaqqissanngippat upalungaarsimasut aningaasanik amerlanerusunik pisariaqartitsipput.

- Tassa taakkua sanngiiffivut nassaariniarsarivagut sumerpiamiinnersut, taavalu atortutigut amigaateqarsimappata naammassiniarsarisussaassavarput kisiannili ukua atortuvut akisummata ilaatigut immaqa kommunimi ilaasortat ikiortiginiartussaassuavut pisussaaffitta naammassiniarnerani.

Nutaarmiuni illu februaarip qulingani ikuallammat qatserisartut tallimat nunaqarfimmi ungasinngisaani Tasiusameersut aggertinneqaraluarput, taakkuli illu ikuallangaatsialereersoq aatsaat apuussinnaasimapput.

Ikuallattoqarnerani ajortuliortoqarsinnaaneranik pasinartoqanngitsoq, politiit ilisimatitsissutigaat.