Ikuallannerup kingorna: Nunaqarfimmiut tunaartassaaleqipput
Upalungaarsimasussanik isumalluutissaqanngillat, ikiortissaqaratillu isiginnaaginnartariaqarput.
Avannaata Kommuniani nunaqarfinni ikuallattoqarpat atugassarititaasut ilaatigut tassa taamaapput.
Inatsit naapertorlugu pinngitsoorani qatserisartoqarlunilu qatseruteqartussaatitaaneq atuukkaluartoq, kommunemi nunaqarfiit arlallit qatserisartoqaratilluunniit qatserutissaqanngillat,
Ikuallattoqariataartillugulu allatut ajornartumik ikiuiartortunik takkuttoqarnissaata tungaanut akunnerpassuit utaqqisoqartariaqartarpoq.
Inatsit malittareqqusaasoq naapertorlugu, nunaqarfinni minnerpaamik inuit pingasut qatserisartuusussaapput aammalu `qatserummik qamitsissutaasinnaasumik`peqartussaatitaallutik. Qatserullu nunaqarfinni atorsinnaatitaasoq soorlu UTV-iusinnaavoq imaluunniit ATV-iusinnaavoq qatserissummik serpaliisinnaasoq innermulluunniit qamitsisinnaasoq.
Ikiortissaq akunnerpassuit atorlugit takkussinnaavoq
Februaarip qulingani angut 45-nik ukiulik Upernaviup avannaani Nutaarmiuniittoq ikuallagussaalluni toquvoq. Isumannaallisaanerli nunaqarfimmi ima eqartigaaq inuuneq toqulu ajaperlugit pisariaqartarluni.
- Nunaqarfimmi najugallit ikuallattup eqqaanukaapput soriarsinnaanatilli. Aqqarngup qeqqata missaani ikuallanneq pivoq, Nutaarmiuni najugalik Mina Heilmann KNR-mut oqarpoq.
Avannaata Kommuniani upalungaarsimanissamut pisortaq Isak Pjettursson KNR- mut uppernarsaavoq, Nutaarmiuni qatserisartoqaraniluunniit qatseruteqanngitsoq.
- Nutaarmiuni qatserisartoqannginneq sanngiiffigaaarput, taanna oqarpoq.
Taamatuttaaq Avannaani nunaqarfiit ilaanni Tasiusami qatseruteqanngilaq. Qatserutissaami maannakkorpiaq Upernavimmiippoq, tassa 65 kilometerinik isorartussusilimmiippoq, taama Upernaviup eqqaani nunaqarfiit aqutsisuini siulittaasoq Regine N. Bidstrup KNR-mut oqarpoq.
Atortoq atorsinnaanngitsoq
Regine N. Bidstrup nangilluni oqaluttuarpoq, qatserisartoqarnerup tungaatigut Naujaani pissutsit aamma taamaattut, taanna Tasiusamiit 20 kilometerinik ungasissuseqarpoq.
- Qatserut nunaqarfimmiiginnarpoq nakkutigineqaranilu, taanna oqarpoq.
Inatsit naapertorlugu, kommunep qulakkiigassaraa kommunep illoqarfiini nunaqarfiinilu isumannaallisaanerup akisussaaffeqartumik qatserisartoqartissallugit qatserutaateqartissallugillu.
Nunaqarfiillu ilaat qatseruteqaraluarpataluunniit aamma isumannarnerpaanngillat. Nunaqarfinnimi arlalinni ikuallattoqariataaraluarpat qatserisartoqanngilaq aammalu qatserutit paarilluarneqaratik
Assersuutigalugu aasaq 2021-mi Uummannap eqqaanni Ukkusissani qatserut atorsinnaanngimmat inuit pingasut ajunaarput.
Ajunaarneq tamanna kommunemi politikerit ilinniarfigisimasariaqaraluarpaat, taama qatserisartut peqatigiiffiata siulittaasua Poul Olsen isumaqarpoq:
- Tassanili paasereersimasussaagaluarpaat atorsinnaasunik qatseruteqarnissaq qanoq pingaartigisoq aammalu qatserisartunik ilinniartinneqarsimasunik peqartitsisussaallutik, taama oqarpunga naak peqatigiiffitsinniit ilisimaarigaluaripput qatserisartoqarniarneq qanoq ajornartigisinnaasoq, pingaartumik nunaqarfinni taanna oqarpoq.