Atoqatigiinnermut tunngasunik oqaloqatigeeriaaserput ilinniarfittaassap pitsaanerulersissagaa
Atoqatigiinnermut tunngasut atuarfimmi skemamiilissapput. Taamatukanneq.
Nuummimi ilinniarfiusinnaalersussaq nutaarluinnaq ukiaru ammartussanngorpoq.
Sexologiskolen ilinniartunik arlalinnik ilinniartoqartussaq oktobarip arfernani aallartissaaq. Ilinniagarlu taanna aqqutigalugu sexologinngortoqarsinnaavoq. Ilinniagarlu taanna piumaneqarluartuusoq, sexologitut ilinniarsimasoq ilinniarfiusussamullu tassunga tunuliaqutaalluartuusoq Yazmin Fox Eisen oqarpoq.
- Kalaallit Nunaaneersunik arlalinnik ilinniartuuteqarsimavugut, taakku Københavnimi atuarfitsinni ilinniarput, qaammatillu tamaasa Kalaallit Nunaanniit Danmarkiliartarlutik. Qinnuteqartorisartakkagulli amerliartuinnarmata isumaliutigilerparput Kalaallit Nunaanni immikkoortortaqarfimmik pilersitsisinnaalluta, taanna oqarpoq.
Naak ilinniarfissaq oktobarimi aatsaat ammassagaluartoq, nunatsinni sexologitut ilinniarsimasut siulliussanngillat.
Isumaginninnmermut Aqutsisoqarfik atoqatigiinnermut tunngasunik ukkataqartut
Juumuut, tarnip pissusaanik ilisimasallik aamma isumaginninnermi sullissisut Sexologiskolenimi maanna ilinniartinneqaleruttorput.
Isumaginninnermut Aqutsisoqarfik Sexologiskolenimut ukiup ataatsip matuma siorna saaffiginnippoq meeqqanik ikiuigasuarnermi angalasartoqatigiinnik sexologitut ilinniartitsinissamik inniminniilluni.
Ilinniartitsinerlu paasisaqarfiulluarsimavoq – aamma Sexologiskolenimut.
- Taamaaliornitsinni inuiaqatigiinni suut nukittoqutaanersut suullu ajornartorsiutaanersut paasisaqarfigineruagut – ilikkakkagullu maanna ilinniartussatinnut atussavagut, Yasmin Fox Eisen oqarpoq.
Atoqatigiinnermut tunngasut kanngunartuussanngitsut
Nunatsinni atoqatigiinneq kanngunartumut attuumassuteqartinneqartarsimasoq Yasmin Fox Eisenip ilisimalluarpaa. Taassuma kisitsisit nuanninngitsunik taavai. Kinguaassiutitigut innarliinerit, qanigivallaakkamik kinguaassiutitigut atornerluineq aamma nikanarsaalluni tiingaffiginnittarneq ukiorpassuarni ajornartorsiutaapput.
Yasmin Fox Eisenilli nunatsinni nuannersunut tunngasut eqqarsaatigerusunnerunerarpai. Inuimmi iperaasariaqarput kinguaassiutinullu tunngasut peqqinnarnerusumik eqqarsarfigisariaqarpaat.
- Killeq qaangerlugu kinguaassiutitigut pineqarsimagutta tamatta soorunami kanngugissavarput, taamaattoqarsimaneralu kisimiilluta pigiinnaraluarutsigu allannguisinnaanngilagut. Taava nuannerunnaarlunilu ajortikkiartuinnassaaq, toqunartunissallunilu, taanna oqarpoq.
Isummat pigiliutiinnakkaniit maligassiuinermut
Yazmin Fox Eisenip misilittakkani malillugit kalaallit inuttut ammasorujussuartut unneqqarissutullu isiginerarpai.
Inuiaqatigiit immaqa eqqartugassanut oqimaannerusunut eqqartuinissaminnut pikkorippallaartarsimanngikkaluarlutik ukiuni kingullerni tamatumunnga nukittorsimapput eqqartugassallu oqimaannerusut nipituuliuutigisinnaalersimallugit.
- Allannguisoqarusunnera malunnarpoq – aammali imminut upperinerunissamik angorusutaqarneq malunnarluni, taanna oqarpoq.
Taamaammallu ineriartorneq ilorraap tungaanut saakkumaartoq Yasmin Fox Eisenip neriuutigaa. Kalaallimmi tassaalersinnaapput atoqatigiinnermut tunngasunik oqaloqatigiissuteqallaqqissut, imminnullu ilikkarnerusinnaasut – immaqalu nunarsuup sinneranut maligassiuisinnaasut:
- Ajunngitsunik suliniuteqartoqalerpat inuiaqatigiit allarluinnarmut sangussapput, tassami kinguaassiutinut tunngasut allatut ilillugit eqqartorneqartariaqarput. Kalaallit Nunaallu tamatumunnga maligassiuisuusinnaavoq. Nunammitamarmik ajunnginnerusinnaajuaannarput, taanna oqarpoq nangillunilu:
- Qanoq iliorlutaana inuit eqqarsariaasaannik nikisitsisinnaaniartugut. Qanoq ililluta allanut maligassiuisunngorsinnaavugut, naleqassuserput imminullu inuiattut tulluusimaarutiginissarput qanoq ilillugu nassaareqqissinnaavarput? Tamakku tassa eqqartugassaapput.
