Kinguaassiuutitigut nappaatinik ilisimatusartoq: Kinguaassiuutit pillugit ilinniartitsineq kulturimut tulluarsartariaqarpoq
Nuannertaraluartoq bakteeriat tassanngaanneersut nuannaarutaavallaartanngillat.
Nunatsinni meeqqat atuarfiini kinguaassiuutit pillugit ilinniartitsineq danskit ilinniartitseriaasiat ilaarlugu ingerlanneqartarpoq. Taamaammallu nunatsinni kinguaassiuutitigut nappaatit atugaanerujussuannik annikillisitsiniarluni iliuutsit iluatsippallaarsimangillat.
- Kinguaassiuutit pillugit ilinniartitsineq kalaallit kulturiannut tulluarsagaanani danskilli paasinnittariaasiat naapertornerullugu ingerlanneqartarpoq. Periuseq Danmarkimi pissutsinut tulluartoq Kalaallit Nunnaannut nuuiinnarneqarsinnaanngilaq. Oqariartuutiginiakkanik pinaversaartitsinernillu kalaallinut tulluarsakkanik ineriartortitsisoqartariaqarpoq.
Elizabeth Rink, USA-mi naalagaaffeeqqap Montanap ilisimatusarfianeersoq nunatsinni kinguaassiuutitigut nappaatit pillugit ukiuni 16-ini ilisimatusarsimasoq taama oqarpoq.
Kalaallit pingaartitaat ilinniartitsinermi tunngavigineqartariaqarput
Kinguaassiuutit pillugit ilinniartitsinermi danskit periusaannik ilaarsiinnartarneq Elizabeth Rinkip tamatumunnga pissutaaqataanerarpaa. Taassuma angajoqqaat ilaquttat illoqarfigisarlu paasisitsiniaanermut ilaatinneqarnerusariaqarsorai:
- Kalaallit Nunaanni naleqartitat, soorlu ilaquttat, imminut illoqarfigisarlu pillugu akisussaaqataaneq qitiutillugit ilinniartitsinerit ilusilersorneqartariaqarput. Inuusuttut kinguaassiuutinut tunngatillugu isumatusaartumik aalajangiisinnaassuseqalernissaannut tapersersorniarllugit ilaqutariit tamarmiusut peqataanissaannut periaatsinik sakkussanillu nassaarniartoqartariaqarpoq.
Siunissaq ungasinnerusoq isigalugu pilersaarusiortoqartariaqarpoq
Inuilli ataasiakkaarlugit isiginiarnissaat aamma pingaaruteqarnerarpaa, ilisimatusarnerummi takutimmagu nikallungarujussuartarneq ilaatigut peqqinnanngitsumik illersuuteqarnanilu atoqateqartarnermik pissuteqartartoq.
- Inuit ataasiakkaat ajornartorsiutaat paasiniartariaqarpagut, inuusuttut isumatusaarnerusumik pissuseqarnissaat pillugu illoqarfigisaanni qanoq iliortoqarsinnaanera misissorneqartariaqarpoq.
Elizabeth Rink oqarpoq.
Sisimiuni Peqqissaavik Faceookikkut quppernermigut innuttaasunut kaammattuivoq syfilisimik tunillanneqarsimasorisut piaartumik misissortikkiartoqqullugit.
Sermitsiaq.AG -ip allaaseraa kinguaassiuutitigut nappaatinik tunillanneqarsimasut amerliartupiloortut, taamaammallu tunillanneqarsimasorigaanni piaartumik peqqissaavimmut misissortikkiartortoqartarnissaa pingaaruteqartoq.
