Suleqatigiinneq nutaaq atoqatigiinneq kinguaassiutitigullu nappaatit pillugit atuartitsinissamut aqqutissiuussisoq
Kinguaassiutitigut nappaatit. Atoqatigiinneq. Killissat.
Paarisap danskit suliniaqatigiiffiat, Sex og Samfund suleqatigalugu ineriartortiligaanni atuartitsinermi sammisassat ilaat tamakkuupput.
Atuartitsissutit meeqqat atuarfianni angajullerni atuartunut sammisuupput. 8. Klassimit 10. Klassimut atuartut kinguaassiutitigut peqqissuunissamut atuartinneqartassasut inatsimmi allassimavoq, tamarmilli taama periarfissaqartinneqanngillat.
Atuartitsinermi atortussat tassunga iluaqutaassasut, Paarisami peqqinnissamut atatillugu siunnersuisoq, Christina Christensen nassuiaavoq.
- Kalaallit Nunaanni meeqqat atuarfiini atuartitsissutinik maannakkut ineriartortitsisoqanngilaq. Tamanna pissutigalugu ilinniartitsisut ataasiakkaat atuartitsinissaminnut nassaarsiortariaqartarput, siunnersorti oqarpoq.
AAMMA ATUARUK Inuusuttuaqqat akornanni klamydiamik tunillatsissimasut ullormut ikinnerpaamik marluk paasineqartartut
Taava imaappa kinguaassiutinut tunngatillugu maannakkut atuartinneqarneq ajorpat?
- Assigiinngitsorujussuuvoq. Nunatsinni ilinniartitsisunik akisussaaffimmik tigusillutik assigiinngitsunit isumassarsioriarlutik kinguaassiutinut tunngatillugu atuartitsisunik pikkorissorpassuaqarpoq.
- Kisianni meeqqat atuarfiini isumalluutinik amigaateqartoqarpoq, taamaammat nammineq atuartitsissutiliornissaq piffissartornartorujussuummat tamanna amerlasuutigut salliutinneqarneq ajorpoq.
Tamannalu uggornartoq, Christina Christensen isumaqarpoq.
Kinguaassiutitigut nappaatit ukkatarineqartut
Kinguaassiutitigut nappaatit sammisassat pingaartut ilagaat.
Kinguaassiutitigummi nappaatit soorlu Klamydia, gonorré aamma syfilis nunatsinni inuusuttut akornanni ajornartorsiutaangaatsiarput.
Nakorsaaneqarfik naapertorlugu inuusuttuaqqat akornanni klamydiamik tunillatsissimasut marluk 2019-imi ullormut paasineqartarput.
Ukioq taanna inuusuttuaqqat 13-init 19-inut ukiullit akornanni gonorrémik tunillatsissimasoq ataaseq ullormut aamma paasineqartarpoq.
- Atuartitsissutissat nutaat kinguaassiutitigut nappaatit aamma timip qanoq iluseqarnera pillugu sungiutaatitaqassapput. Aamma killiliinissamut killiliinermillu paasinninnissamut suniutaatiteqassapput, Christina Christensen oqarpoq.
- Suaassutsit assigiinngitsut, tamat qanoq assigiinngissuseqarnerat taakku aamma inissaqartinnissaat aamma ukkatarineqassapput, Christina Christensen oqarpoq.
Atuartitsissutissat nutaat 2023-mi meeqqat atuarfiiniilernissaat pilersaarutaavoq.