Inuusuttuaqqat akornanni klamydiamik tunillatsissimasut ullormut ikinnerpaamik marluk paasineqartartut

Kinguaassiutitigut nappaatit tuniluuttut nunatsinni ajornartorsiutaaqaat.

Nunatsinnimi 20-it inorlugit ukiulinni kinguaassiutitigut naappaammik klamydiamik tunillatsissimasut ikinnerpaamik marluk, gonorrémillu nappaateqartoq ikinnerpaamik ataaseq 2019-imi ullut tamarluinnaasa siumorneqarput.

Syfilisittaaq, nunatsinni ukiorpaalunni takussaasimanngikkaluartoq, ukiuni kingullerni pingasuni tuniluutilerpoq, nunattalu nakorsaanera naapertorlugu allanngujaasseqqalluni.

- Takutikkamikku soorlu syfilisertut ikiliartunngitsut, taama amerlatigiinnartut. Syfilis eqqarsaatigissagaanni sivisuumik atugarigaanni kingunipilutsitsioqarsinnagami, taamaasillunilu ernumanarsinnaalluni, peqqissutsimut tunngasuni siunnersorti, Silvia Isidor, Nunattalu Nakorsaaneqarfiani nappaatit tuniluuttut pillugit kisitsilerisoq, taama oqarpoq.

Nunatsinni ukiorpaalunni syfilisertoqanngereersoq, ukiuni pingasuni kingullerni allanngujaattumik tuniluuttoq, Nunatta nakorsaanerata Henrik L. Hansenip paasissutissiissutigaa.

AAMMA ATUARUK Nakorsaq kinguaassiuutigut nappaatillit amerliartornerat pillugu: Akisussaassuseqaritsi!

Syfilis kinguaassiuutitigut nappaataavoq imminullu illersornani atoqateqarnermi tuniluuttartoq. Syfilis nakorsarneqanngikkuni sianiutikkut aseruuttoortitsisinnaavoq qaratsamilu aseruuttoortitsisinnaalluni.

Arnat kinguaassiutitigut nappaateqarlutik nalunaarsorneqartut angutiniit amerlanerujussuupput, soorli taamaannersoq ilisimaneqanngilaq, Silvia Isidorili naapertorlugu arnat naartulernermi naappaatinut misissortittarnerat peqqutaaqataasinnaavoq.

Arnat inuusuttuaqqat 18-inik 19-inillu ukiullit 1.000-iugaangata 400-it pallingajallugit - tassalu arnat 18-inik 19-inillu ukiullit quliuppata sisamat pallingajallugit klamydiamik 2019-imi tunillatsissimasut Nunatta nakorsaaneqarfiata allakkiaata takutippaa.

Allatut oqaatigalugu nunatsinni inuusuttuaqqat 20-it inorlugit ukiulinni klamydiamik tunillatsissimasut ullut tamaasa ikinnerpaamik marluk 2019-imi siumorneqarput, ukiukitsumillu klamydiamik tunillatsissimasumik ullut tallimakkaarlugit siumuisoqartarluni.

Ukiukitsoq 15-it inorlugit ukioqartuuvoq.

Meeqqat akornanni gonorrértut

Gonorré pillugu kisitsisit aamma uissuumminarput.

Nunatsinni inuusuttuaqqani gonorrémik tunillatsissimasumik ikinnerpaamik ataatsimik ullut tamaasa 2019-imi siumuisoqartarpoq. Ukiukitsumik gonorrémik tunillatsissimasumik qaammatit affakkaarlugit 2019-imi aamma siumuisoqartarpoq.

Meeraq 15-it inorlugit ukiulik kinguaassiuutitigut naappaateqartoq paasineqarpat, peqqinnissaqarfimmi sulisut kommunimut meeqqap najugaqarfigiisaanut nalunaartussaatitaapput. Sulisut meeqqap tunillatsissimaneranut atatillugu pinerluttoqarsimaneranik pasitsaassaqarunik politiinut nalunaassapput.

AAMMA ATUARUK Arfineq-pingasut HIV-mik tunillatsissimasut

Usuup pooqarnissaq kinguaassiuutitigut nappaateqatsaaliornermi iliuusissat qularnaannerit ilagaat.

- Soorunami pingaarnerpaavoq imminut illersornissaq, usuup puaa atornissaa. Pingaartumik inuusuttut arlalinnik assigiinngitsunik atoqateqartarunik. Soorunami aamma arlaannik ersiuteqaleruit, soorlu ilukkut annialeruit ikeqalerlutilluunniit, innersuutissavarput ingerlaannaq napparsimaveqarfimmut attaveqarnissaq. Aamma atoqateqalernermi paasigaanni atoqatissap ussup puua atulinngikkaa naameersinnaaneq, peqqissutsimut tunngasuni siunnersorti, Silvia Isidor taama oqarpoq.

Nunatsinni HIV-imik 2019-imi tunillatsittut arfineq pingasuupput.