Nakorsaq kinguaassiuutigut nappaatillit amerliartornerat pillugu: Akisussaassuseqaritsi!
Kinguaassiuutitigut nappaatit nunatsinni ajornartorsiutaangaatsiartuarsinnarput, minnerunngitsumik Sisimiuni.
Nakorsaq Jan Olsen Sisimiuni qitiusumik napparsimmaveqarfiup Facebookiani taama allappoq.
Nakorsap Jan Olsenip kinguaassiuutitigullu nappaatit qatsulluinnarpai - ingammik usuup puuinik napparsimmavimmut akeqanngitsumik aallertoqarsinnaammat aamma aaversinnikkut quinikkullu misissortittoqarsinnaammat.
- Inuit amerlasuut illersuuteqaratik atoqatigiittarsimanerat kinguaassiuutitigut nappaatit amerlanerannut takussutissaavoq, nakorsaq Jan Olsen allappoq.
HIV-mik tunillatsissimasut ilaat illersuuteqaratik atoqateqartartut
Sisimiuni 36-it gonorrémik 32-llu klamydiamik tunillatsissimasut marsimi paasineqartut aammali syfilisi HIV-ilu ajornartorsiutaasut, nakorsaq aamma allappoq.
Sisimiuni Ilulissanilu inuusuttut akornanni HIV-mik tuniluuttoqartoq Sisimiut napparsimmavianni 2018-mi paasineqartoq, nakorsaq allappoq.
AAMMA ATUARUK HIV-p tunillaassuunnera mianersoqqussutigineqartoq
HIV-mik tunillatsissimasut inuunermi sinnera ullut tamaasa iisartagartortussaapput, iisartagartunngikkunillu ukiut arlaqanngitsut qaangiuppata AIDS-imik toqquteqarsinnaallutik. HIV-mik tunillatsissimasut ilaasa nakorsaatitornissamik nakkutiginissaat ajornartorsiutigisaraat, nakorsaq ilanngullugu allappoq.
- Tamanna erseqqissumik paasissutissiissutigisaraluarlugu illoqarfimmi HIV-mik tunillatsisimasut ilaat iisartakkatik ajoraluartumik iineq ajoraat ilisimavarput. Taakkualu illersuuteqaratik atoqateqartarput, atoqatigisimasatillu HIV-mik tunillatsissimanerminnik ilisimatissanagit, nakorsaq allappoq.
Sisimiuni nakorsap Facebookimi allatani naggaserlugu usuup puuinik atuinissamik kaammattuuteqarpoq imalu oqarluni:
- Akisussaassuseqaritsi! Kinguaassiuutitigut nappaatit ingerlateqqinnagit.