Ataatsimiititaliami amerlanerussuteqartut urani innuttaasunut taasititsissutigerusukkaat

Uranimik ujaasinissamut piiaanissamullu inerteqquteqalernissamik inatsisissatut siunnersuut pingajussaannik suliarineqanngilaattaa, Inatsisartut aatsitassarsiornermut ataatsimiititaliaani amerlanerussuteqartut allannguutissanik marlunnik saqqummiussipput.
- Taamannaannaavik ingerlaniarutta nunarput avammut tatiginassutsikkut innarlerneqaraluttuinnassooq. Taava erseqqissumik innuttaasut aappimik naamimilluunniit taasitinneqarpata, tassani inississavarput pitullugu paarnaarlugu illersorsinnaasumik, Aqqalu Jerimiassen oqarpoq. Assi © : KNR
novembarip 09-at 2021 05:41

Urani inuiaqatigiinnit taasissutigineqassaaq. Inuussutissarsiornermut Aatsitassanullu Ataatsimiititaliami amerlanerussuteqartut taama kissaateqarput.

Naalakkersuisut ikorfartortaasa Atassutip inatsisissamut allannguutit marluk, Siumumit taperserteqarlutik, piumasaqaatigaat.

AAMMA ATUARUK Uranimik inerteqquteqarniarneq alloriarfiusoq illuatungiliuttulli itigartitserusuttut

Atassut urani pillugu apeqqummut qeqqani inissisimavoq. Apeqqut Inatsisartunit aalajangiiffigineqartinnagu inuiaqatigiit taasissutigissagaat partiip piumasaralugu.

Aatsitassanik uranitalinnik piiaaqqusinngilluinnarneq Naalakkersuisut atuutsileqqikkusuppaat.

Sangujoraartumik ingerlatsineq nunatsinnut kingunerluuteqarsinnaasoq

Uranimimmi inerteqquteqarneq Naalakkersuisut nikinneri tamaasa allanngortinneqartassappat nunanit allanit isigaluta tatiginassuserput innarlerneqaraluttuinnassasoq Atassutip siulittaasua isumaqarpoq.

- Taamannaannaavik ingerlaniarutta nunarput avammut tatiginassutsikkut innarlerneqaraluttuinnassooq. Taava erseqqissumik innuttaasut aappimik naamimilluunniit taasitinneqarpata, tassani inississavarput pitullugu paarnaarlugu illersorsinnaasumik, Aqqalu Jerimiassen oqarpoq.

Tamassuma saniatigut inatsisissatut siunnersuummi paragraf 2 Siumup Atassutillu peerusuppaat.

Naalakkersuisut aatsitassanut allanut, soorlu thoriumimik, piiaasinnaanermut apeqqutinut aalajaangiisinnaanermik periarfissaqalernissaannik paragrafi taanna pisinnaatitsilissaaq. Naalakkersuisulli Inatsisartut avaqqullugit apeqqutinut angisuunut aalajangiisinnaanngornissaat, Atassutip kissaatiginngilaa.

Inatsisissatut siunnersuut allanngornani akuersissutigineqarsinnaasoq

Inuussutissarsiornermut Aatsitassanullu Ataatsimiititaliami ilaasortat amerlanerussuteqartut inatsisissamut allannguutissatut siunnersuuteqaraluartut tamatuma piviusunngornissaa qulanarpoq. Inatsisartunimi amerlanerussuteqartut, tassa Inuit Ataqatigiit Naleqqallu, inatsisissatut siunnersuut akuersissutigisinnaavaat.

 

AAMMA ATUARUK Nuummi pingasunngorpamit filmfestivalertoqalissasoq

 

Aatsitassamimmi uranitalimmik piiaasinnaanerup minnerpaammiitsinnissaa Naalakkersuisuutitaqartut qineqqusaarutiginikuuaat. Taamaattumillu inatsisissap akuersissutigineqarnissaa ilimanaateqarluarpoq.