Nuummi pingasunngorpamit filmfestivalertoqalissasoq

Nuuk International Film Festival aqagu ukiut tallimassaannik aaqqissuunneqassaaq.

Ukioq manna festivaleqarnerani nunap inoqqaavinit filmiliarineqartut isiginnaartitsissutigineqartullu ukkatarineqassapput. Tamanna festivalimit Emile Hertling Péronardip ukioq manna aallakaatitassat tulluusimaarutigai:

- Nunanit tamalaanit aallakaatitassarissaarpugut, taakkunannga amerlasuut nunap inoqqaavinit suliaapput. Tamatuma saniatigut oqallitsitsisoqassallunilu oqallittoqassaaq.

Kalaallit filmiliaat arlallit pilersaarutinut ilaapput. Berda Larsenip naatsuliaa ’Tuullik’ aamma Paninnguaq Lind Jensenip David Heilmann Ottosenillu piviusulersaarusiaat ’White Paper’ nunatta kujataani Kuannersuarni aatsitassarsiornissamut tunngasoq Ilaatigut isiginnaarneqarsinnaassapput.

- Festivaali kalaallinut filmiliortartunut kateriffiuvoq, taamaammat kalaallit filmiliortarnerisa ineriartungaatsiartut piffissamilu soqutiginarluinnartumiittut iserfiginissaannut pissutissaalluarpoq, Emile Hertling Péronard oqarpoq.

Hollywoodimit tikeraartoqassasoq

Filmiliaritillammassuit Nikolaj Coster Waldau aamma islandimiu Baltasar Kormákur aamma tikeraartuussapput.

Isiginnaartitsisartut taakku Netflixikkut saqqummertussami ”Against the Ice”-imi peqataapput, taannalu nunatsinni pisuullunilu Ejner Mikkelsenimut Iver Iversenimullu nunatta avannaani inuuniarsimasunut pillugit piviusumik oqaluttuaalluni.

Taakku peqataanerminni filmi pillugu oqaluttuassapput.

Festivalertoqarnerani New Zealandimit Canadamiillu filmilianik aamma takutitsisoqassaaq aamma tyskit franskillu filmiliortartui workshoppertitsissallutik.

- Festivalertitsisoqarnerani filmertarfinni nalinginnassumik takutinneqarneq ajortut isiginnaarneqarnissaat periarfissatsialaavoq. Filmit ataqatigiiffigingaatsiartutut misigisinnaasagut, nunanit tamalaani nunap inoqqaavinit suliarineqartut takutissavagut, Emile Hertling Péronard oqarpoq.

Nuuk International Film Festival arfininngornermi unnukkut septembarip 18-ianni akissarsititsisoqarneranik naggaserneqassaaq.

Festivalimut pilersaarut uani takusinnaavat.