Arsummi puttasut iluarsartuunneqartussanngortut
Arsummi puttasut anorersuarnerani ajoqusernerat pissutigalugu Sarfaq Ittuk sapaatip akunnerani uani Arsummut aqqusaarsinnaanngitsoq, Arctic Umiaq Line ataasinngornermi nalunaaruteqarpoq.
Puttasut piffissami kingullermi anorersuartarnerani ajoquserput, inuttanullu ilaasunullu isumannaallisaanikkut illersorneqarsinnaanatik. Taamaammat puttasut iluarsineqareerpata Sarfaq ittuk aatsaat Arsummut aqqusaaqqissinnaasoq, Arctic Umiaq Line aalajangerpoq.
Decembarip sisamaani piareerniarneqartoq
Sila atoruminassappat puttasut ulluni pingasuni sisamaniluunniit qaammatip naalernerani iluarsaanniarneqarput. Talittarfillu kingusinnerpaamik decembarip ulluisa sisamaanni piareerniarneqarluni. Innuttaasullu billitsimik pisereersimasut Arctic Umiaq Linemut saaffiginneqquneqarput.
Angallannermut naalakkersuisoqarfiup immikkut qulimiguulimmik angallassinissat aamma qulakkeerpai:
Iluarsaassinissap saniatigut assartuussinissamik pisariaqartitsisoqarpat qulimiguulinnik angallassinerit ilaneqarsinnaanerat naalakkersuisoqarfiup qulakkeerpaa.
- Disko Line-miit qulimiguulimmik assartuussinissat ataqatigiissaarneqassapput, taamaattumillu innuttaasut assartuussinissamut periarfissat pillugit sukumiinerusumik Disko Line-mut attaveqassasut, Angallannermut naalakkersuisoq, Karl Frederik Danielsen kaammattuivoq.
