Podcast nutaaq: Arnat nakuuserfigineqartut kisimiittutut misigissanngillat

Sikkerninnguaq Gärtner aappariinneq nakuuserfiusumiinnikuuvoq. Maanna arnat nakuuserfigineqartut podcastimik kalaallisut oqaaseqartunut pilersitsiniarluni aalajangerpoq. Kisimiittutut misiginnginnissaq pingaaruteqarmat.

Allattoq Ulrikke Andersen, Camilla Egeborg Møller

oktobarip 01-at 2024 07:24

Sikkerninnguaq Gärtner ilisimaneqarluartuuvoq, Podcast tusarnaagassiat pinerluttulikkersaarutit Kalaallit Nunaanni nunanilu allani pisimasunik saquummersitsisarpoq taaguutilik "Inuartoq by Sikkerninnguaq”, taannalu Facebookimi 10.000-nit malinnaavigineqarluni.

Maannaali nunatsinni ajornartorsiut oqallisigineqarpiarneq ajortoq podcastiliarissallugu aalajangerpaa. Tassa: Aappariinnermi nakuuserneq.

27-nik ukiulik Sikkerninnguaq Gärtner Upernaviup qanittuani nunaqarfimmi Nuussuarmi peroriartorpoq. Massakkullu INUIT Quality Clothes of Greenlandimi Social Media Manageritut sulivoq, sulinermi saniatigut podcastiliai nuannarineqarluarlutik.

Aamma atuaruk Naligiissitaaneq suli tusiappoq: Arnanut nakuusertarneq ajornartorsiutaanerpaavoq

Sikkerninnguaq Gärtner Namminermi nakuusernermik aqqusaagaqarsimavoq, nalornissuteqartarnermini kisimiittutut misisarnermini, tusarnaagassiamik amigaateqarsimavoq.

Aappariinneq nakuuserfiusoq

Angutaaneq arnaanerlu peqqutigalugu persuttaasarneq – Oqartoqarpoq kalaallit arnat 62 %-ii inuunerminni persuttagaareersimasut.
Marloriaammillu aamma amerlanerullutik arnat inuusuttut angutinit inuusuttunit timikkut persuttartissimasut. 10,7% arnat inuusuttut 5,9% angutit inuusuttut.
Pisuni 67%-iusuni maannakkut imaluunniit siusinnerusukkut aapparisimasap, arnamut persuttaasuusarmat.
Arnat marloriaataat sinnerujussuarlugu angutininngarnik kinguaassiuutitigut atornerlunneqarsimasut 34% arnat aamma 15% angutit.

Taamaammat Sikkerninnguaq Gärtnerip arnat nakuuserfigineqartut paasissutissanik pissarsisinnaanissaat kissaatigaa.

- Imaata kalaallisut ingerlanissaa pingaaruteqartippara. Soorlu qallunaatut tuluttulluunniit paasisinnaasugut podcasterpassuaqarpoq, youtubekkut isiginnaarsinnaavugut qanoq iliorsinnaanerluta. Kisianni kalaallit taamatut aqqusaagaqartut ikannermut, kalaalerparparpassuit, taava una pingaaruteqarsoritippara kalaallisut taamatut tusarnaariaannarmik peqarnissaa, kalaallisuinnarmi oqaaseqaruni, taanna oqarpoq.

Iliuusissaaleqineq

Sikkerninnguaq Gärtnerip iliuusissaaleqineq nalunngilaa. Sivisuumik eqqarsaatigereerlugu podcastiliorniarluni aalajangerpoq. Tigoriaannaammat tusarnaariaannaammat misilittagaqarfigereerlugulu.

- Aamma inuit tigulluarnerusaramikkit podcastit tusariaannaat tigoriaannaat taava arnaqatikka taamatut misiginikut immaqa iluaqutigisinnaammatigik tusarnaariannaagaqarlutik. Kisimiittutut misigisariaqarnatik, Sikkerninnguaq Gärtner oqarpoq.

Aappariinnermi nakuuserneqarfiusoq kiserliornartorujussuunerarpaa, misiginarsinnaalluni aniguinngisaannartussaalluni.

Aamma atuarukArnat suleqatigiit: Arnanik persuttaasarneq akerleralugu sapaatiuppat aappaluttumaarit

Iliuusissaaleqinarsinnaasoq piffissami tassani oqariartuutigaa aniguinissamut neriuuteqartoq.

- Piffissami tassaniilluni misiginarsinnaasarami tassa qaqugumorsuarluunniit inuuneq taamatut ingerlalersoq. Peqqutigalugu aniguisinnaannginnatta. Taava inuit taamatut misigisut takutinniarlugit inuuneqartoq nuannernerusumik ilumoortumik aniguisoqarsinnaasoq qanorluunniit sivisutigisumik sorsukkaluaraanni, taanna oqarpoq.

Inuuneq nuannernerulersinnaavoq

Sikkerninnguaq Gärtnerip nammineq nalunngilluinnarpaa qanoq ersinartiginersoq oqaluttuarissallugu, taamaammat ammanerusumik oqallisaalernissaa naatsorsuuteqarnani oqaatigaa. Oqaluttuarissallugu ersinarami kisimiilluni imaaliallaannaq oqaluttuarineqarsinnaanani. Taamaakkaluartoq naqissuserusuppaa inuuneq nuannernerusoq pilersinneqarsinnaasoq.

- Nalunnginnakku qanoq ersinartigisoq qanoq ajornartigisoq eqqartuinnavinnissaa. Una anguniarnerorusuinnarnikuuarput, arnap timikkut tarnikkut persuttartittartup kisimiinnani paasinninnissaa kisimiinnani taamatut aqqusaagaqartoq taavalu inuunermut nuannernerusumut ingerlaqqissinnaasoq, taanna oqarpoq.

Podcast suliarineqalerpoq. Aallakaatitsivimmi Sikkerninnguaq Gärtner ilaatigut sammisamut ilisimasalinnik pulaartoqartassaaq. Soorlu tarnip pissusaanik immikkut ilisimasallit, qimarnguivinni sulisut, inulerisullu allat, taakkuupput aniguinissamut sakkussanik eqqortunik tunisisinnaajumaartut.

Arnat aapparminnit nakuuserfigineqarnertik pillugu misigisaminnik oqaluttuarusuttut Sikkerninnguaq Gärtnerimut kinaassutsiminik isertuussillutik mailikkut messengerikkut saaffiginnissinnaapput.

Nutaarsiassami kukkunermik nassaarsimaguit uunga allaffigineqarsinnaavugut.