Naligiissitaaneq suli tusiappoq: Arnanut nakuusertarneq ajornartorsiutaanerpaavoq

Spiralilersuisoqarsimanera, suliat KNI-mut tunngasut, KNI-mi pisortaasimasup, Peter

Grønvold Samuelsenip sulisunut arfinilinnut kannguttaatsuliorsimanini pillugu qaammatini pingasuni pineqaatissinneqarsimasunut inissiisarfimmiinnera, Ivaaqqamullu suliat tunngasut. Tassa tusagassiuutitigut ukioq manna sammineqaqisut ilaat.

Arnanut nakuusernernut kannguttaatsuliornernullu tamarmik tunngasut.

Tamanna nunatsinni arnanut nakuusertarnerup qanoq annertutigineranut ersiutaasoq, Kathrine Bødker isumaqarpoq.

- Arnanut naqisimannittoqartillugu arnanut nakuusertoqakkajuttarpoq. Tamanna pissaanermik peqqinnanngitsumik ingerlariuseqarnermik inuiaqatigiinni ajornartorsiutaavoq.

Politiit nakuusertoqarsimaneranik kisitsisaataat 2022-meersoq naapertorlugu, nakuusertoqarsimaneranik 1090-inik nalunaaruteqartoqarsimavoq, angerlarsimaffimmilu eqqissiviilliornerit 2.500-t nalunaarutigineqarsimallutik. Taamaattoqartillugu arnat meeqqallu eqqugaanerpaasartut, Kathrine Bødker oqarpoq.

Nakuuserneq akioruminaatsorujussuaq 

Arnalli qasserpiaat nakuuserfigineqarsimanersut, ilisimanngilarput.

Nakuusertoqarsimatillugumi kina kimut nakuusersimasarnersoq nalunaarsorneqarneq ajorput. Tamannalu ajornartorsiutaangaatsiartoq, Kathrine Bødker isumaqarpoq.

- Arnanut nakuusertoqartarneranik akiuiniarnermi ajornartorsiutaangaatsiartut aamma ilagaat, tassa arnanut nakuusertoqartarnerata isaasalerlugu oqaatigineqaqqusaanngitsutut innera, politiimmi kikkut nakuusertuunersut kinalu nakuuserfigineqarnersoq nakuusertoqartarneranik nalunaarsuinermi paasineq ajorpaat, taanna oqarpoq.

Nalunaarsuisarnerullu ajornartorsiutaanera, naligiissitaanermut naalakkersuisup, Naaja Nathanielsenip isumaqatigaa.

Arnanut nakuusertarnerup akiorneqarnissaa naalakkersuisut pingaarnerit ilaattut suliaqartut, taassuma naqissuserpaa. Taamaammat nakuusertarneq eqqarsaatigalugu, katsorsarneqarnissamik tapersersorneqarnissamullu tunngasumik nutaamik iliuusissatut pilersaarusiortoqartoq, taanna oqarpoq.

Iliuusissatut pilersaarusiaq ukioq manna naammassineqarnissaa pilersaarutaavoq.

- Arnaannaanngitsut aammali meeqqat isiginnittuusut eqqugaasartut aamma eqqarsaatigissavagut, ilisimavarpullu siusissukkut iliuuseqarfigineqanngikkuni nakuuserneq kinguaariit tulliini atugaaqqittartoq, taamaalilluta kinguaariippassuarni sunniutai takussallutigit, Naaja Nathanielsen oqarpoq.

Arnanik isiginneriaaseq ajortoq

Nunatsinni arnat ingerlariaqqiffiusunut ilinniartartut ilisimatusarfimmilu ilinniartut amerlanerugaluartut, suliffeqarfinni naligiissitaaneq aamma tusiattoq, Kathrine Bødker isumaqarpoq.

- Angutit inuiaqatigiinni suliffeqarnermilu qaffasinnerpaamik atorfinni suli inissisimallutillu akissarsiaqarnerupput, taamaammat arnanut suli assigiinngisitsisoqartoq oqaatigineqarsinnaavoq, Kathrine Bødker oqarpoq.

Kalaallit Nunaata naatsorsueqqissaartarfia kisitsisaataat 2021-imeersut naapertorlugit, arnat angutit ukiumut akissarsiaasa 77 procentiinik akissarsiaqartarput.

- Taava imatut oqartoqarsinnaavoq, inuiaqatigiit arnanut isiginnittariaasiat arlaatigut pitsaanngilaq. Arnat pisinnaasaat ammut isigigigut, piginnaasaat ammut isigigigut pikkoriffiimi pillugit akilerneqarneq ajorput, Kathrine Bødker oqarpoq.

Suliat tamarmik ataqatigiipput

Nunatsinni arnanut nakuusertarnermut suliat tunngasut qiviarneqartariaqartut, Naaja Nathanielsen oqarpoq.

- Assersuutigalugu spiralilersuisoqarsimanera, suliat KNI-mut tunngasut aamma Ivaaqqami suliat takutiinnarpaat nunatsinni ajornartorsiut qanoq annertutigineqarsoq.

Tassami suliat tusagassiutini sammineqalersartut suliatut ataasiakkaatut suliarineqaqqajaasartut, taanna isumaqarpoq.

- Suliat ataasiakkaatut isumaginiaannavikkutsigit ataatsimut assiliartaa ullut tamaasa, ukioq naallugu naligiissitaanermut suliamut tunngasoq naligiissitaannginnerullu suli pinngortarnera takunngitsuussavarput, Naaja Nathanielsen oqarpoq.

Suiaassuserli aallaavigalugu naligiinngittoqarnera nunatsinniinnaq ajornartorsiutaanngilaq.

Naggueqatigut aamma naligiissitaaneq eqqarsaatigalugu sorsugassaqaqisut, Naaja Nathanielsen isumaqarpoq.

- Nunap inoqqaavi allat aamma qiviarutsigit suiaassutsit akornanni  aligiissitaannginnerujussuarmiipput takunissaannut ilisimasat misissorujussuartariaqanngillat, taamaammat nammineq naalakkersuisoqarnitsinni akisussaaffeqarpugut.