Arnat suleqatigiit: Arnanik persuttaasarneq akerleralugu sapaatiuppat aappaluttumaarit
Arnat ulluanni kiatit, kjolit ilupaalluunniit aappaluttoq atorukkit arnanut persuttaasarneq akerlaralugu takutissavat. Brugsenimiikkuit, kaffisoriarfinniikkuit aqqusinermiikkuilluunniit.
Arnat pisinnaatitaaffii pillugit Nuummi suliniaqatigiiffik 8. marts gruppen taama oqariartuuteqarput.
- Taamaasiornikkut takutissavarput timikkut tarnikkullu ikilersuisarneq akuerineqanngilluinnaqqissaartoq, Inge Olsvig Brandt 8. marts gruppemi ilaasortaq oqarpoq. Taassuma erseqqissaatigaa aappaluttumaarneq arnanut angutinullu kaammattuutaasoq.
- Pingaaruteqartorujussuuvoq ulloqartitsisarneq, taanna ulloq atorlugu arnarpassuit naapeqatigiillutik immikkut ittumik arnat atugarisaannik eqqartueqatigiittarneq ingerlanneqartarmat.
Arnat ulluat malunnartinneqassaaq
Naligiissitaanermut Siunnersuisoqatigiit arnat ulluat Katuami malunnartinniarpaat.
Arnat saqqummiisussat ilagaat Tukumminnguaq Nykjær Olsen, ICC-p allatseqarfiani aqutsisoq, nunani issittuni arnat atugarisaat pillugit saqqummiisussaq. Inga Dora G. Markussen, Me too Islandimilu naligiissitaaneq pillugit aamma saqqummiissaaq.
8. marts gruppen naapertorlugu nunatsinni arnat amerlavallaat assigiinngitsutigut persuttagaanermik killimillu qaangerneqarnermik aqqusaangaqartarput.
Arnarpassuit ersiorlutik, kanngusullutik timikkut tarnikkullu ikilerneqangaatsiarsimallutik inuupput.
- Arnanik persuttaasarneq suli nunatsinni annertoorujussuuvoq taavalu aamma statistikki qiviaraanni persuttaasarnerup kingunerisaanik toqusut arnat amerlanerupput, Inge Olsvig Brandt oqarpoq. Allanillu aamma assersuuteqarluni:
- Arnat illoqarfitsik qimallugit ernisarnerat. Taanna ajornartorsiutaasinnaavoq annertoorujussuarmik. Kisianni aamma massakkut kingullertigut annertuumik sammineqartoq kinguaassiutitigut imaluunniit atoqatigiinnikkut imaluunniit tiinganiarnikkut killissanik qaangiinerujussuaq eqqartorneqarnissaa annertuumik pisariaqarpoq.
The Red Dress Project
Suliniut "The Red Dress Project" aappaluttumaarneq Canadamit aallaveqarpoq, Canadami USA-milu arnat nunap inoqqaavi periarfeerunneqarsimasut toqusimasulluunniit eqqaaniarlugit aallarnerneqartoq.
Aappaluttumaarneq pingasunik peqquteqartoq, Inge Olsvig Brandtip erseqqissaatigaa.
- Siullermik akilinermiut Canadamiittut arnartaat puigorneqannginnissaat eqqaaniarneqarnissaallu anguniarlugu taamatut kaammattuuteqarpugut, Inge Olsvig Brandt oqarpoq.
Pissutaasutullu aappiullugu nunatsinni arnat persuttagaasartut eqqaaniarneqartussaasut.
- Taavalu aamma pingajuattut ataatsimoorussamik persuttaasarnerup akiorneqarnissaanut kaammattuilluta.
Akilernermiut upperisaat
Qalipaatillu aappaluttup toqqarneqarnera peqquteqarpoq:
- Akilinermiut Canadamiittut arnartaasa upperimmassuk qalipaat aappaluttoq tassaasoq toqusortatta anersaavisa qalipaat taanna kisiat takusinnaagaat.
- Aaappaluttumaarnerup takutippaa misiginneqatiginneq, iliuuseqarusunneq, taavalu tapersersuivugut nunatsinni arnat persuttagaasartut akiorneqarnissaannut suliniuteqarneq taavalu aamma soorunami inuit pisinnaatitaaffiinut aamma illersuineruvoq.
Arnat Nunani tamalaani ulloqalernisssaat Naalagaaffiit peqatigiinnit 1975-mi akuerisaavoq.
Ullorlu Kinami, Cubami, Makedoniami, Ugandami Vietnamimilu sapaatitut nalliussineqartarpoq.
