Politiinit nalunaarut: Arfininngorneq suli ulapiffiuvoq
Pisoq sakkortunerpaatut taaneqarsinnaasoq, nunaqarfimmi Atammimmi Nuup avannaata nalaaniittumi, angut sakkortuumik nakuuserluni saassussisimasoq tingusarineqarsimavoq. Tingusarineqartoq toqutseriaraluarsimasutut pasineqarpoq, Nunatsinni politiit pingaartuisa pisortaat, Preben Kleist paasissutissiivoq.
Nakuuserluni saassunneqarsimasoq piaartumik, Dronning Ingridip napparsimmavissuanut Nuummiittumut aallarunneqarsimavoq, saassunneqarsimasulli qanoq innera pillugu, nunatsinni politiit paasissutissiisinnaanngikkallarput.
Pisoq politiinit suli misissorneqarpoq.
Sisimiuni angallannermi ajutoortoqarpoq
Ullaaq manna tillinniartoqartoq nalunaarutiginnittoqarpoq, politiinillu pisoqarfik orninneqarpoq.
Kingorna angallannermi ajutoortoqarpoq, politiillu ilimagivaat biilinik aquttoq, tillinniarfimmiit qimaatilluni ajutoorsimassasoq, Politiit pingaartuisa pisortaat paasissutissiivoq.
Pisumi biilini aquttoq aalakoortoq politiinit tingusarineqarpoq
Nuummi ikuallattoqartoq
Nuummi ippassaq unnulersoq, Qinngorput Brugsenimi ikuallattoqarnerani politiit ikuallattoqarfik matoqqatippaat, qatserisartut ikuallattumik qamisaammata.
Ikuallattoq qaminneqarpoq inunnillu ajutoortoqarsimaneranik nalunaartoqanngilaq, ikuallattoqarneratalu qanoq kinguneqarneranik, politiit oqaaseqarsinnaanngikkallarput.
Arfininngorneq suli eqqissiviilliortunik ulapiffiuvoq, sumiiffinni assigiinngitsuni imingassartorsimanermut attuumassutilinnik pisunut, eqqissiviilliortoqarnerani politiinik pisariaqartitsiffinni, Nunatsinni politiit suliaqartuarsinnarput, Nunatsinni Politiit pingaartuisa pisortaat taama naggasiivoq.
