Arfernut pallittaaliissutit naammanngillat
Aalisartut bundgarnii arfernit aserorneqarsinnaasarneri pillugit pallittaaliissutit whalepingersit KNR-imit nutaarsiarineqareerput.
Aalisartulli ilaasa tamakkiisumik iluaqutaannginneri isummerfigaat.
Aalisartoq soraarneq Knud Jensen Qeqertarsuarmeersoq ima isummerpoq:
- Tamakkununnga ajunaartaqattaartut isiginnaaginnassavagut turistit takusassaqartinnissaat piinnarlugu? Uanga taanna apeqquterujunngortittarpara.
- Qippoqqaat saarullittortorujuugamik, aalisagassaaruttussaapput sineriassortut.
Aalisartunut ulorianarsinnaasut
Qeqertarsuatsiaaneersup aalisarnermik inuutissarsiuteqartup Steffanus Boyep ima misigisalikkersaarpoq:
- Uanga tassa ajunaaqqajarnikuuvunga tassunga qipoqqapalaamut. Tuttut nalaani aamma ukiakkut taamaaasinerani Nuuliaassillunga, Nuup saavani qipoqqarpassuaqarami taamanikkut, taarsisoq ikaalerlunga umiarsualivikkut nuereerlunga puiffigigaminga. Sakkortunerusumik ingerlasuuguma pusissimassagaluarpunga innakaavikkaluarpunga. Qipoqqaruna innukkumaarpoq arlaani taamatut.
Qipoqqaat aporneqarsinnaanerinik ulorianartorsiortoqarsinnaanera kisiat pineqanngilaq, aalisarniarnermili akornutaaneri ilannguppaa:
- Qipoqqaat pulagaangamik bungarnersornerup nalaani, bungarn pisaqarneq sapilertarput. Taama oqaraanni. Nerinialertramik sissaq sinerlugu tamakku, pingaartumik aamma arferit qipoqqaallu, tassa piniagarput sarulliit piniagarput tammarallartarput. Uagut massakkut aalisarnitsinnut ajornartorsiutigeruluuleratsigi.
Amerliartortput
Pinngortilaeriffimmi timmisartorluni ukioq 1984-mit ukiut qulikkaarlugit kisitsisoqarsimavoq,
Timmisartumik qulaavaanikkut kisitsinerup takutippaa ukiumut 270-inik amerlisartut, nunattalu sineriaata imartaani 3000-iusut ilimagineqarpoq.
Ukiut qulingajaat qaangiupput kingullermik qipoqqaat kisinneqarmata.Taamaammat Pinngortitalerivimmiut qipoqqaat nunatta sineriaata imartaani qanoq amerlatigineri ilisimaqqissaanngilaat.
Nungutaalerneranilli ulorianartorsiunngitsut ilisimatuup Mads Peter Heide-Jørgensen ilannguppaa.
- Sineriammi qipoqqaat amerliartorneri qulakkeersinnaanngilarput, ukioq 2015-mili qipoqqaat 993-iinnanngorsimasut naatsorsorneqartoq, ilisimatooq Mads Peter Heide-Jørgensen akissuteqaammini allappoq.
Ukiormanna septemberip 23.-ni Arfanniarnermut ataatsimiititaliarsuup akuersissutaanni ukioq 2026-miit 2031-mut qipoqqarnut pisassiissutit allanngorneqanngitsut allaqqavoq.
