Arctic Green Foodip tunitsiviisa ingerlaannarnissaat naalakkersuisut kissaatigaat
Apeqqut taanna pissutigalugu naalakkersuisut tapiissuteqarnissaq qularnanngitsumik tunuarsimaarfigivallaarunnaarpaat.
Sullissinissamik isumaqatigiissutip nunaqarfinni qulingiluaasuni suliarineqartartut imminnut naapertuutinngitsutut Inatsisartut aningaasaqarnermut ataatsimiititaliaata isumaqarfigai.
Allatut oqaatigalugu ima apeqqutinngortinneqarsinnaavoq: Arctic Green Foodimut tapiissutigineqartartut ilaminiinnanngui nunaqarfimmiut aalisartortaannut tunisassiorfinnilu sulisut kaasarfiinut tuttarpata – taava tapiissutit amerlavallaanngitsut taakkua nunaqarfinnut ajornartorsiortunut toqqaannartumik tunniukkaanni pitsaanerussanngila, aningaasat taakkua marloriaatinngorlugit Arctic Green Foodimut sullissinissamik isumaqatigiissutinik taallugit tunniunnagit? Apeqqut tamanna Arctic Green Foodimut sullissinissamik isumaqatigiissutissamut atatillugu aningaasaqarnermut ataatsimiititaliap isumaliutissiissutaani toqqaannanngikkaluamik 2007-imi aamma 2008-mi apeqqutigineqartarpoq.
- Namminersornerullutik Oqartussat inuussutissarsiornermut taama imminut akilersinnaanngitsigisumut pisortat aningaasaataannik tapiiuaannarsinnaanngillat, aningaasanut inatsisissap suliarineqarneranut atatillugu ataatsimiititaliaq ukiunut marlunnut taaneqartunut atatillugu allappoq. Aningaasanut inatsisissap ukiormannamut atuuttup akuersissutigineqarneranut atatillugu, Arctic Green Foodimut sullissinissamut isumaqatigiissut ilanngarneqarujussuarpoq. Tapiissutit 17 millionit koruuniusartut 8 millioninut appartinneqarput. Ukiuni tulliuttuni marlunni tapiissutit ikiliartuaartinneqassapput, taamaalilluni 2011-miit nunaqarfinni tunisassiorfinnut qulingiluaasunut tapiisoqartarunnaassalluni, aningaasanut inatsisip missingersuutaani taama allattoqarpoq.
Tapiissutaasartut 17 millioniusut apparterujussuarneqarnerannut atatillugu, isumaqatigiissutip nunaqarfinni qanoq iluaqutaatiginera nalilersorneqarpoq. Aningaasaqarnermut ataatsimiititaliap AGF-imit nalunaarutinik pissarsiniarneq ajornartorsiutigisarpaa. Taamaattorli naalakkersuisunit ilisimatitsissutigineqartut najoqqutaralugit, nunaqarfinni tunisassiorfiit qulingiluaasut siorna januaarimiit oktobarimut 7,5 millionit nalinginut tunitsivigineqarput, ulapaarfiullu nalaani 69-inik sulisoqarlutik, ulapaartoqannginneratalu nalaani taamaallaat 26-nik sulisoqartarlutik.
Arctic Green Foodip Namminersornerullutik Oqartussanut isumaqatigiissutaa januaarip naanerani atorunnaarpoq. Taamaattorli naalakkersuisut maanna qaammatini pingasuni atuuttussamik 3,8 millionit koruuninik tapiissuteqarlutik nutaamik isumaqatigiissuteqarusupput, nunaqarfinni tunisassiorfiit ingerlaannarsinnaaniassammata. Tamatumanili aningaasaqarnermut ataatsimiititaliap akuerseqqaarnissaa pisariaqarpoq, ataatsimiititaliarlu naalakkersuisut qinnuteqaataannik suli tigusaqarsimanngilaq.
