Aqqaluk Lynge ilaatigut Inuit Ataqatigiinnik pilersitseqataanikuuvoq aamma Inatsisartuni Naalakkersuisunilu ilaasortaasimavoq.Assi: KNR

Aqqaluk Lynge ataqqinaataasumik doktorinngortinneqartoq

ICC-mi præsidentiusimasoq, Aqqaluk Lynge, kalaallinik nunatsinni nunallu tamat akornanni ukiorpassuarni sullissinerminut ataqqinaataasumik Ilisimatusarfimmit doktorinngortinneqarpoq.

Ilisimatusarfiup tallimanngornermi ukiumoortumik nalliuttorsiornerani 73-inik ukiulik Aqqaluk Lynge ataqqinaataasumik Ilisimatusarfimmit doktorinngortinneqarpoq.

Taama Ilisimatusarfik tusagassiuutinut nalunaaruteqarpoq.

Aqqaluk Lynge nalliuttornermi oqalugiartunit ataqqiniarneqarpoq. Ilaatigut Kulturimik, Oqaatsinik Oqaluttuarisaarnermillu Ilisimatusarfimmi atorfillit nukarlersaannit, studieadjunktimit Qivioq Løvstrømit.

AAMMA ATUARUK Meeqqat atuarfiat pillugu suleqatigiinniarnerat pitsaalluinnarpoq

- Aqqaluk qasujaalluni kalaallit, nunallu inoqqaavisa pisinnaatitaaffii sorsuutigisimavai, oqallorissusinilu atorluarlugu uummatit, matut aqqutillu matoqqasimasut ammartarsimallugit. Namminiilivinnermut aqqut naggorissarsimavaa sorlagut nukittorsarlugit kusanartumik sikkersinnaanngortilluta, Qivioq Løvstrøm oqarpoq.

Aqqaluk Lynge ilaatigut Inuit Ataqatigiinnik pilersitseqataanikuuvoq aamma Inatsisartuni Naalakkersuisunilu ilaasortaasimavoq.

Ph.d.-tut allagartartaartut sisamat

Ilisimatusarfiup ukiumoortumik nalliuttorsiornerani ph.d.-nngortut sisamat aamma nalliuttorsiutigineqarput.  Ph.d.-tut allagartartaartut sisamat tassaapput:

  • Mariekathrine Poppel ilisimatuutut allaatigisaminut ”Mænds vold mod kvinder i samliv”
  • Naja Carina Steenholdt ilisimatuutut allaatigisaminut “Subjective Well-being and Quality of Life in Greenland"
  • Mitdlarak Lennert ilisimatuutut allaatigisaminut “The administrative context of the Greenland primary and lower secondary school system - a governance system misaligned with learning" 
  • Bonnie Jensen ilisimatuutut allaatigisaminut "Barndomshjem eller børnehjem? - Et kvalitativt studie af 38 børns oplevelser af at blive og være anbragt på døgninstitution i Grønland".

AAMMA ATUARUK Inuunermi naleqartitat atugarissaarnerlu pillugu apersorneqarusuttut ujaarineqarput

Ukiumoortumik nalliuttorsiornermi Bodil Marie Damgaard, Greenland Holdingimi allaffissornermi pisortaq oqalugiartuuvoq, Ilisimatusarfiullu tusagassiuutinut nalunaarutaa naapertorlugu oqalugiaatimini ilisimatusartut inuussutissarsiortullu akornanni suleqatigiinnerup pingaaruteqassusia immitsinnullu qanoq atorsinnaanerput atortariaqarnerpullu sammivaa.

Ilisimatusarfiup rektoria Gitte Adler Reimer aaqqissuussinermi qaaqqusisuuvoq, tikilluaqqusillunilu oqalugiarnermini Ilisimatusarfiup ukiuni kingullerni angunikuusarpassui sammivai: Ilinniartut aallartittut aatsaat taamatut amerlatigisut aamma immikkoortut pingaaruteqartut soorlu isumannaatsuunissamik politikki oqaatsillu sammillugit ilisimatusarfinnik nutaanik arlalinnik pilersitsineq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl